سابق خاتون اول کی قریبی دوست فرح خان نے کرپشن کے الزامات کا سامنا کرنے کیلئے دبئی سے وطن واپس آنے کا فیصلہ کیا ہے۔
تفصیلات کے مطابق سابق خاتون اول کی قریبی دوست فرحت شہزادی المعروف فرح گوگی اور ان کے شوہر احسن جمیل گجر نے آمدن سے زائد اثاثہ جات کے الزامات پر دبئی سے 10 مئی کو پاکستان واپس آنے کا فیصلہ کیا ہے۔
ذرائع کے مطابق فرح خان نے نیب کا دائرہ اختیار چیلنج کرنے کا فیصلہ کرتے ہوئے اپنی قانونی ٹیم سے مشاورت مکمل کر لی ہے۔
فرح خان کے وکیل کے مطابق احسن جمیل جب چیئرمین ضلع کونسل تھے اس وقت ان کی فرح خان سے شادی ہی نہیں ہوئی تھی،اس لئے نام کا غلط استعمال کرنے پر عطا تارڑ کیخلاف قانونی چارہ جوئی کر رہے ہیں، نیب پرائیویٹ لوگوں کیخلاف انکوائری نہیں کر سکتا، کیونکہ فرح خان پبلک آفس ہولڈر نہیں تھیں۔
دوسری جانب نیب لاہورکے ترجمان کا کہنا ہے کہ فرح خان کا کیس نیب کے دائرہ اختیار میں آتا ہے ، نیب کسی بھی پبلک آفس ہولڈر یا اسکے اہلخانہ کے خلاف آمدن سے زائد اثاثوں کی انکوائری کا آغاز کر سکتا ہے، فرح خان کے شوہر احسن جمیل گجر 1997ء سے 1999ء تک ضلع کونسل گوجرانولہ کے چیئرمین رہے، آئین کے مطابق سابق عہدے دار یا انکے اہلخانہ کیخلاف کرپشن و مالی بدعنوانی کی شکایات نیب کے دائرہ اختیار میں آتی ہے، نیب فرح خان کیس کی شفاف تحقیقات کرے گا۔
یاد رہے کہ رہنماء مسلم لیگ ن عطا تارڑ نے فرح خان سے وطن واپس آ کر الزامات کا سامنا کرنے کا مطالبہ کیا تھا۔
