وزیراعظم شہباز شریف نے اداروں کیخلاف ہرزہ سرائی پر عمران خان کیخلاف قانونی کاروائی کا اعلان کیا ہے۔
اسلام آباد – (اے پی پی): وزیراعظم شہبازشریف نے عمران خان کے خطاب کو پاکستان کے خلاف سازش قرار دیتے ہوئے کہا ہے کہ ایبٹ آباد میں آج ریاست پاکستان، آئین اور قومی اداروں کو چیلنج کیاگیا، قانونی کارروائی کریں گے ،پاکستان کے قومی اداروں کے خلاف سازشی بیانیہ گھڑنے والا اصل میں میر جعفر اور میر صادق ہے،پہلے عمران نیازی نے پاکستان کی معیشت ڈبونے کی سازش کی، اب خانہ جنگی کرانے کی کوشش کررہا ہے ۔
اتوار کو وزیراعظم آفس میڈیا ونگ کی طرف سے جاری بیان کے مطابق وزیراعظم شہبازشریف نے ایبٹ آباد جلسہ میں عمران خان کے خطاب کو پاکستان کے خلاف سازش قرار دے دیا ہے ۔ انہوں نے کہاکہ ایبٹ آباد میں آج ریاست پاکستان، آئین اور قومی اداروں کو چیلنج کیاگیا، قانونی کارروائی کریں گے ،عمران نیازی سیاست نہیں سازش کررہا ہے، یہ سازش پاکستان کے خلاف ہورہی ہے،ایک شخص کی انا، تکبر ، جھوٹ پر پاکستان قربان نہیں کرسکتے،پہلے عمران نیازی نے پاکستان کی معیشت ڈبونے کی سازش کی، اب خانہ جنگی کرانے کی کوشش کررہا ہے ،عمران نیازی کی ملک میں خانہ جنگی کرانے کی سازش کچل دیں گے ۔
وزیراعظم نے کہاکہ عمران نیازی آج کے دور کا میر جعفر اور میر صادق ہے جو پاکستان کو لیبیا اور عراق بنانا چاہتا ہے ،میرصادق کے ساتھ بھی صادق لگا ہوا تھا جس طرح عمران نیازی کو سرکاری صداقت کا سرٹیفکیٹ ملا تھا ،عمران نیازی اسی تھالی میں چھید کررہا ہے جس میں اُس نے کھایا ۔
