صدر مملکت ڈاکٹر عارف علوی نے سپریم کورٹ کے سینئر وکیل ایڈووکیٹ اشتر اوصاف کو بطور اٹارنی جنرل پاکستان (اے جی پی) تعینات کرنے کی منظوری دے دی ہے۔
ایوان صدر سے جاری بیان میں بتایا گیا ہے کہ صدر مملکت عارف علوی نے آئین کے آرٹیکل 100 (1) کے تحت وزیراعظم پاکستان شہباز شریف کی سفارش پر اشتر اوصاف کو اٹارنی جنرل آف پاکستان تعینات کردیا ہے۔
آئین کے آرٹیکل 100 (1) کے مطابق صدر مملکت اٹارنی جنرل آف پاکستان کے عہدے پر ایسے شخص کو تعینات کرے گا جو سپریم کورٹ کا جج بننے کی اہلیت رکھتا ہو۔
صدر مملکت ڈاکٹر عارف علوی نے اشتر اوصاف علی کی بطور اٹارنی جنرل پاکستان تعیناتی کی منظوری دے دی
صدر مملکت نے اٹارنی جنرل کی تعیناتی آئین کے آرٹیکل 100 (1) کے تحت وزیر اعظم کے مشورے پر کی
اٹارنی جنرل آف پاکستان کا عہدہ خالد جاوید خان کے استعفے کے بعد خالی ہوا تھا
— The President of Pakistan (@PresOfPakistan) May 9, 2022
یاد رہے کہ سابق اٹارنی جنرل خالد جاوید خان حکومت کی برطرفی کے بعد عہدے سے مستعفی ہو گئے تھے۔ بعد ازاں نئی حکومت کی کابینہ کی تشکیل کے بعد 7 مئی کو وفاقی وزیر قانون اعظم نذیر تارڑ نے اشتر اوصاف کی تعیناتی کی سمری منظوری کیلئے صدر مملکت کو بھیجنے کی تصدیق کی تھی۔
