وفاقی وزیر داخلہ رانا ثناءاللہ خان نے کہا ہے کہ صدر مملکت وزیراعظم کی ایڈوائس کے پابند ہیں، اس سے ہٹنا آئین شکنی ہوگی، صدر مملکت اور گورنر پنجاب کو آئین اور سپریم کورٹ کے حکم پر عمل کرنا چاہئے اور اس کی خلاف ورزی نہیں کرنی چاہئے۔

اسلام آباد – (اے پی پی): پیر کے روز جاری کئے گئے اپنے بیان میں انہوں نے کہا کہ چند گھنٹوں کے گورنر شرافت سے گھر چلے جائیں اور اپنی عزت مزید خراب نہ کریں تو بہتر ہو گا۔ انہوں نے کہا کہ صدر مملکت وزیراعظم کی ایڈوائس کے پابند ہیں، اس سے ہٹنا آئین شکنی ہوگی۔ انہوں نے کہا کہ صدر مملکت اور گورنر پنجاب کو آئین اور سپریم کورٹ کے حکم پر عمل کرنا چاہئے اور اس کی خلاف ورزی نہیں کرنی چاہئے۔

وزیر داخلہ نے کہا کہ سپریم کورٹ قرار دے چکی ہے کہ صدر کے پاس کوئی اِن ہیرنٹ یا  ریذیڈیول پاورز نہیں ۔ انہوں نے کہا کہ پارلیمانی جمہوریت میں صدر کا منصب علامتی ہوتا ہے، ان کے پاس ویٹو کا اختیار نہیں، ایوان صدر پی ٹی آئی سیکرٹریٹ نہیں ، آئین پر چلیں۔

وزیر داخلہ نے کہا کہ عمرچیمہ شرافت سے گھر چلے جائیں ، انہوں نے کہا کہ صدر اور گورنر ایسا کوئی کام نہ کریں کہ تاریخ اور عوام انہیں اچھے الفاظ سے یاد نہ کریں، آئین سے ہٹنے والوں کو آئین، عدالت اور عوام کی سزا کے لئے تیار رہنا ہو گا۔