قومی اسمبلی نے صدر  مملکت ڈاکٹر عارف علوی کے غیر  آئینی احکامات جاری کرنے کے خلاف قرار داد مذمت منظور کر لی۔

اسپیکر قومی اسمبلی راجہ پرویز اشرف کی زیر صدارت ہونے والے قومی اسمبلی کے اجلاس میں صدر مملکت ڈاکٹر عارف علوی کے خلاف پیش کی گئی قرارداد میں کہا گیا کہ صدر مملکت نے گورنر پنجاب کی تقرری کے معاملے میں غیر آئینی احکامات جاری کئے۔

قرارداد میں کہا گیا کہ صدر مملکت نے ایوان صدر کے دفتر کا غیر آئینی استعمال کیا، ایوان سمجھتا ہے کہ آئین کے مطابق ہر شہری آئین کا تابع ہے، صدر پاکستان بھی آئین کے تحفظ اور دفاع کے پابند ہیں۔

قرارداد کے متن کے مطابق  صدر کی طرف سے بیان کردہ غیر آئینی مؤقف پر ایوان کو سخت اعتراض ہے، صدر کا آئین سے انحراف عہدے اور پارلیمانی جمہوریت کے خلاف ہے، صدر پریہ  ایوان زور دیتا ہے کہ وہ غیر جانبدار رہ کر آئین کے مطابق ذمہ داریاں ادا کریں۔

قومی اسمبلی نے صدر مملکت کے خلاف پیش کی گئی مذمتی قرارداد منظور کر لی، جبکہ جی ڈی اے نے قرارداد کی مخالفت کی۔