آرمی چیف جنرل قمر جاوید باجوہ نے کھاریاں گیریژن کا دورہ کیا ہے۔

پاک فوج کے شعبہ تعلقات عامہ آئی ایس پی آر کے مطابق کھاریاں گیریژن پہنچنے پر کمانڈر سینٹرل کمانڈ لیفٹیننٹ جنرل شاہین مظہر محمود نے آرمی چیف کا استقبال کیا۔ آرمی چیف نے دورے کے موقع پر سینٹرل کمانڈ کے زیر اہتمام جاری وار گیمز کا جائزہ لیا۔

آئی ایس پی آر کا کہنا ہے کہ وار گیم سیشن کا مقصد فارمیشن کے منصوبوں کی تطہیر تھا، آرمی چیف نے حصہ لینے والے جوانوں کے تربیتی جذبے اور مہارت کو سراہا ہے۔آرمی چیف  نے دورے کے موقع پر جاری تربیتی جنگی مشقوں، سینٹرل کمانڈ کی اسٹرائیک فارمیشنز کی منصوبہ بندی اور آپریشنل تیاریوں کا جائزہ لیا ہے۔

آئی ایس پی آر کے مطابق  آرمی چیف نے جوانوں کی پیشہ ورانہ مہارتوں کے عزم کو سراہا، جبکہ آرمی چیف نے فارمیشنز کے تربیتی اور حربی صلاحیتوں کی تعریف کی۔

 آرمی چیف نے میدان جنگ کی حکمت عملی اور جنگی مظاہرے کا بھی مشاہدہ کیا ، مشقوں میں نئی حاصل ٹیکنالوجیز پر مہارت میں اضافہ کی توثیق بھی شامل تھی۔

آئی ایس پی آر کا کہنا ہے کہ آرمی چیف نے ابھرتے خطرے کیخلاف فارمیشنزکی آپریشنل تیاری کی تعریف کی ہے۔