وزیراعظم شہباز شریف نے اتحادی جماعتوں کا اہم اجلاس پیر کو طلب کرلیا، جس میں فوری انتخابات اور نگراں حکومت کے معاملے پر مشاورت ،اور حکومتی مدت کے حوالے سے فیصلہ کیا جائے گا۔
وزیراعظم شہباز شریف کی زیر صدارت اتحادی جماعتوں کا اجلاس پیر کو ہوگا، جس میں ملکی کی موجودہ معاشی صورت حال، آئی ایم ایف سمیت دیگر معاملات کا جائزہ لے کر اتحادیوں کی حمایت و تائید سے مستقبل کا فیصلہ کیا جائے گا۔شہباز شریف حکومت کے مستقبل سے متعلق آپشنز اور دورہ لندن میں طے پانے والے امور کو اتحادی جماعتوں کے سامنے رکھیں گے، حکومت کو تجویز دی گئی ہے کہ تین سے چار مہینے کیلئے سخت فیصلے کرنا ہوں گے۔
مسلم لیگ ن میں رائے پائی جاتی ہے کہ حکومت کی جانب سے لئے گئے سخت فیصلوں کی ذمہ داری تمام اتحادی جماعتیں بھی لیں، کیونکہ اسمبلیاں توڑنے سے معاشی مسائل حل نہیں ہوں گے، اگر اسمبلیاں توڑ دیں تو نگران حکومت میں معیشت کا زیادہ برا حال ہوگا کیونکہ آئی ایم ایف شرائط کی وجہ سے سبسڈی نہیں دی جا سکتی۔ آئی ایم ایف کے ساتھ معاہدہ طے پاتے ہی دوست ممالک پاکستان کی کھل کر مدد کریں گے، تین سے چار مہینے کے مشکل وقت کے بعد معیشت مستحکم ہونے کا امکان ہے۔ اتحادی جماعتوں کی حمایت و تائید کے بعد حکومت حتمی فیصلہ کرے گی۔
ذرائع کے مطابق اجلاس میں فوری طور پر انتخابی اصلاحات اور نگران سیٹ اپ پر بھی مشاورت کی جائے گی، اور اس حوالے سے حکومت پی ٹی آئی سے بھی رابطہ کرے گی ۔ ذرائع کا کہنا ہے کہ اگر پی ٹی آئی نے دلچسپی نہ دکھائی تو اپوزیشن لیڈر کا انتخاب کر کے معاملات کا فیصلہ کرلیا جائے گا۔
