صدر مملکت ڈاکٹر عارف علوی نے کہا ہے کہ پاکستان اور سعودی عرب متعدد علاقائی اور عالمی امور پر ہم آہنگی رکھتے ہیں، دونوں ممالک کے مابین مختلف شعبوں میں اسٹریٹجک اور وسیع البنیاد شراکت داری کو مزید فروغ دینے کی ضرورت ہے۔
پاکستان میں سعودی عرب کے سفیر نواف بن سعید احمد المالکی نے ایوان صدر میں صدر مملکت ڈاکٹر عارف علوی سے ملاقات کی، جس میں پاکستان اور سعودی عرب کے درمیان مشترکہ مذہب، مشترکہ اقدار اور ثقافت پر مبنی دیرینہ برادرانہ تعلقات کو مزید مضبوط بنانے کی خواہش کا اعادہ کیا گیا۔
صدر مملکت ڈاکٹر عارف علوی سے پاکستان میں سعودی عرب کے سفیر نواف بن سعید احمد المالکی کی ملاقات
پاکستان سعودی عرب کے ساتھ اپنے تعلقات کو انتہائی اہمیت دیتا ہے، صدر مملکت
سعودی عرب نے ہمیشہ مشکل وقت میں پاکستان کا ساتھ دیا، صدر مملکت pic.twitter.com/gREs8OmJuZ
— The President of Pakistan (@PresOfPakistan) May 17, 2022
صدر مملکت نے کہا کہ پاکستان سعودی عرب کے ساتھ اپنے تعلقات کو انتہائی اہمیت دیتا ہے جس نے ہمیشہ مشکل وقت میں پاکستان کا ساتھ دیا۔ انہوں نے مزید کہا کہ دونوں ممالک متعدد علاقائی اور عالمی امور پر یکساں مؤقف رکھتے ہیں۔ انہوں نے دونوں برادر ممالک کے باہمی مفاد کے لیے سعودی عرب کے ساتھ مختلف شعبوں میں اسٹریٹجک اور وسیع البنیاد شراکت داری کو مزید فروغ دینے کی ضرورت پر زور دیا۔ تجارتی تعلقات کو مزید بڑھانے اور دونوں ممالک کے تاجروں اور چیمبرز آف کامرس کو باہمی تجارتی تعلقات کو مزید فروغ دینے کے لیے باقاعدگی سے بات چیت کرنے کی ترغیب دینے پر زور دیا گیا۔
صدر نے کہا کہ سعودی عرب میں 20 لاکھ سے زائد پاکستانی دونوں برادر ممالک کی ترقی اور خوشحالی میں اہم کردار ادا کر رہے ہیں۔ اس موقع پر صدر مملکت نے خادم حرمین شریفین کے لئے نیک خواہشات کا پیغام بھی دیا اور کہا کہ پاکستانی عوام ان کی اچھی صحت اور درازی عمر کے لیے دعاگو ہیں۔
