سابق وزیر  خزانہ اسحاق ڈار نے پٹرولیم مصنوعات کی قیمتوں پر نوازشریف کا موقف واضح کر دیا ہے۔

 نجی نشریاتی ادارے  سے گفتگو کرتے ہوئے سابق وزیر خزانہ اسحاق کا کہنا تھا کہ مسلم لیگ (ن) اور نواز شریف یہ نہیں سمجھتے کہ سارا بوجھ عوام پر ڈالا جائے اور چاہتے ہیں کہ یہ سبسڈی 30 جون تک جاری رہے۔

انہوں نے کہا کہ یہ سبسڈی پورے ملک میں استعمال ہوگی اور سب کو اس کا فائدہ ہوگا، وفاق اور صوبے جس تناسب سے  اپنی آمدنی شیئر کرتے ہیں اسی تناسب سے سبسڈی کا بوجھ اٹھالیں، اگر خیبر پختونخوا یا کوئی صوبہ اس فارمولے سے اتفاق نہیں کرتا تو وفاق اس صوبے کیلئے اتنی ہی قیمت بڑھا دے، یہ فارمولہ آئی ایم ایف کیلئے قابل قبول ہونا چاہیے۔

سابق وزیر خزانہ نے کہا کہ جانے والی حکومت ملکی تاریخ کا بدترین بجٹ خسارہ چھوڑ کر گئی ہے، اس وقت 5600 ارب کا خسارہ ہے، دوسری طرف کرنسی کا فری فال جاری ہے، ڈالر ایک روپیہ بڑھنے سے خود بخود 130 ارب  روپےقرضہ بڑھ جاتا ہے۔

اسحاق ڈار نے کہا کہ اس حکومت کو آرام سے کام کرنے دیا جائے، چیزیں بہتر ہوسکتی ہیں،  لیکن اگر حکومت کو دباؤ میں رکھیں گے تو  مارکیٹ سے بے یقینی کا خاتمہ نہیں ہوگا۔