صدر مملکت ڈاکٹر عارف علوی نے سرکاری دستاویزات افشا کرنے والے نیب افسر کو نوکری سے نکالنے کی سزا برقرار رکھی ہے۔ نیب سکھر کے سابق اسسٹنٹ ڈائریکٹر فہیم اللہ نے خفیہ سرکاری معلومات غیر قانونی طور پر ایک مطلوب ملزم کو فراہم کی تھی ، معلومات کی بنیاد پرنیب کیس میں ایک مطلوب شخص گرفتاری سے بچ کر فرار ہوگیا تھا۔
صدر مملکت ڈاکٹر عارف علوی نے کہا کہ کرپٹ افراد کو صرف نوکری سے نکالنے کی سزا کافی نہیں ۔ انہوں نے ہدایت کی کہ نیب کرپٹ حکام اور کیس میں شامل دیگر افراد کے خلاف کارروائی کرے ۔ صدر عارف علوی نے کہا کہ نیب عدالت کی مدد سے کیس میں ملوث تمام افراد کو سزا دلوائے ، کرپٹ حکام نے ملک کو دھوکہ دیا، انسداد بدعنوانی کے ادارے ہی میں کرپشن کر ڈالی ۔ تفصیلات کے مطابق نیب نے سابق اسسٹنٹ ڈائریکٹر نیب سکھر فہیم اللہ کوسروس سے نکالنے کی سزا دی تھی ، فہیم اللہ نے وارنٹ گرفتاری کے بارے معلومات سابق ڈپٹی اسسٹنٹ ڈائریکٹر محکمہ خوارک ، لاڑکانہ کو فراہم کی ۔
سابق ڈپٹی اسسٹنٹ ڈائریکٹر محکمہ خوارک ، لاڑکانہ ، رفیق احمد راجپر ، نیب کو خوراک کیس میں مطلوب تھے، فہیم اللہ نے بروقت معلومات اپنے دوست یعقوب راجپر ، سابق ڈپٹی اسسٹنٹ ڈائریکٹر نیب کو دی ، یعقوب راجپر نے معلومات رفیق راجپر کو دی جو موقع سے فرار ہو گیا اور گرفتاری سے بچ گیا۔ انکوائری کے بعد فہیم اللہ کے خلاف الزامات ثابت ہونے پر نیب نے نوکری سے نکالنے کی سزا دی ۔ کرپٹ افسر نے سزا کے خلاف صدر مملکت کے پاس اپیل دائر کر رکھی تھی ۔
صدر مملکت نے فہیم اللہ کی درخواست مسترد کردی اور نیب کی جانب سے دی گئی سزا کو برقرار رکھا۔ صدر مملکت ڈاکٹر عارف علوی نے اپنے فیصلے میں کہا کہ درخواست دہندہ سابقہ فیصلہ مسترد کرنے کے حق میں کوئی وجہ پیش نہیں کر سکا، خفیہ معلومات فہیم اللہ سے ہوتی ہوئی رفیق راجپر تک پہنچی جس کی وجہ سے ملزم فرار ہوا، فہیم اللہ، یعقوب راجپر اور رفیق راجپر کے درمیان روابط بھی ثابت ہوگئے ۔
انہوں نے کہا کہ فہیم اللہ اور یعقوب راجپر کے ٹیلی فون کے فرانزک سے صریح کرپشن کے ثبوت ملے ۔ صدر مملکت نے اپنے فیصلے میں کہا کہ فہیم اللہ کی اپیل مسترد کی جاتی ہے ، نیب سکھر میں کرپشن کیس میں سامنے آنے والی تمام تفصیلات کی تحقیقات کرے ۔
