وفاقی وزیر داخلہ رانا ثناءاللہ نے کہا ہے کہ چینی شہریوں کی سکیورٹی اولین ترجیح ہے،اس پر کوئی سمجھوتہ نہیں ہوسکتا، داسو ڈیم اور کراچی یونیورسٹی دہشت گردی کے واقعات انتہائی افسوسناک ہیں، چینی شہریوں کی جانوں کے ضیاع پر پوری پاکستانی قوم کو افسوس ہے۔
ملک میں امن وامان اور پاکستان میں موجود چینی شہریوں کی سکیورٹی کے حوالے سے اہم اجلاس کی صدارت کرتے ہوئے وفاقی وزیر داخلہ کا کہنا تھا نیکٹا ملک سے دہشت گردی ختم کرنے کیلئے انتہائی موثر ادارہ ثابت ہوسکتاہے، محکمہ انسداد دہشت گردی پنجاب کی طرز پر دیگر صوبوں میں ادارے قائم کئے جائیں گے ۔
وزارت داخلہ سے جاری بیان کے مطابق امن و امان کے حوالے سے یہ اہم اجلاس وزیراعظم شہباز شریف کی خصوصی ہدایت پر بلایا گیا تھا۔وفاقی سیکرٹری داخلہ یوسف نسیم کھوکھر سمیت وزارت داخلہ کے اعلیٰ حکام اجلاس میں موجود تھے، جبکہ چاروں صوبوں، آزاد جموں وکشمیراورگلگت بلتستان کے چیف سیکرٹریز اورآئی جی پولیس ، چیئرمین نادرا، نیشنل کوآرڈینیٹر نیکٹا ، چیف کمشنر و آئی جی اسلام آباد اور قانون نافذ کرنے والے دیگر اداروں کے نمائندوں نے بھی شرکت کی۔
اجلاس کا مقصد ملک بھر میں امن وامان کی صورتحال کو یقینی بنانے کے حوالے سے اقدامات کاجائزہ لینا تھا۔پاکستان میں موجود چینی شہریوں کی فُول پروف سکیورٹی کیلئے اقدامات کوحتمی شکل دینا بھی اجلاس کے ایجنڈے میں شامل تھا۔وزیر داخلہ رانا ثناءاللہ نے نیشنل کوآرڈینیٹر نیکٹاکو ہدایت کی کہ نیکٹا کو مکمل فعال بنایا جائے، نیکٹا ملک سے دہشت گردی ختم کرنے کیلئے انتہائی موثر ادارہ ثابت ہوسکتاہے۔
رانا ثناءاللہ نے شرکاء کا ہدایت کی کہ دہشت گردی کے واقعات کے سدّ باب کیلئے انسداد دہشت گردی کے محکموں کوجدید بنایا جائے۔وزیر داخلہ رانا ثناءاللہ نے کہا کہ محکمہ انسداد دہشت گردی پنجاب کی طرز پر دیگر صوبوں میں ادارے قائم کئے جائیں گے، محکمہ انسداد دہشت گردی میں تعینات عملے کو بہترین تنخواہیں اور مراعات دی جائیں گی، محکمہ انسداد دہشت گردی کا ملکی امن و امان میں اور دہشت گردی واقعات روکنے میں کردار کلیدی ہے۔
انہوں نے کہا کہ چینی شہریوں کی سکیورٹی اولین ترجیح ہےاس پر کوئی سمجھوتہ نہیں ہوسکتا۔ وزیر داخلہ نے کہا کہ داسو ڈیم اور کراچی یونیورسٹی دہشت گردی کے واقعات انتہائی افسوسناک ہیں، دہشت گردی واقعات میں چینی شہریوں کی جانوں کے ضیاع پر پوری پاکستانی قوم کو افسوس ہے۔ انہوں نے کہا کہ وفاق اور صوبوں کے درمیان سکیورٹی کے حوالے سے کوآرڈینیشن کو موثر بنانے کی ضرورت ہے، وفاق چاروں صوبوں، آزاد جموں وکشمیر اورگلگت بلتستان حکومتوں کو تمام ضروری وسائل فراہم کریں گے۔ انہوں نے کہا کہ غیر ملکی شہریوں کی حفاظت کیلئے وزارت داخلہ میں خصوصی سیل قائم کیا گیا ہے، فارن نیشنل سکیورٹی سیل صوبائی حکومتوں کے درمیان کوآرڈینیشن کرے گا۔ وزیر داخلہ نے کہا کہ ملک میں پائیدار امن کیلئے تمام وسائل بروئے کار لائیں گے۔
