اسپیکر پنجاب اسمبلی چوہدری پرویز الٰہی نے اسمبلی کا اجلاس کل طلب کر لیا ہے۔

اسپیکر پنجاب اسمبلی نے اسمبلی کا اجلاس 22 مئی بروز اتوار کو طلب کیاہے، واضح رہے کہ اس سے قبل یہ اجلاس 30 مئی  کو طلب کیا گیاتھا۔

ذرائع کے مطابق اسپیکر چوہدری پرویز الٰہی نے آئینی اختیارات استعمال کرتے ہوئے اجلاس کی تاریخ میں تبدیلی کی۔

اسپیکر پنجاب اسمبلی کی طرف سے اسمبلی کا اجلاس 30 کی بجائے 22 مئی کو طلب کرنےکا نوٹیفکیشن جاری کردیا گیا ہے۔

یاد رہےکہ الیکشن کمیشن  نے گزشتہ روز پی ٹی آئی کے منحرف اراکین کے خلاف ریفرنس منظور  کرتے ہوئے 25 اراکین پنجاب اسمبلی کو ڈی سیٹ کردیاہے، جس کے بعد پنجاب میں اپوزیشن کاکہنا ہےکہ حمزہ  شہباز اب وزیراعلیٰ نہیں رہے، اس لئے  اسمبلی کا اجلاس  دوبارہ طلب کرکے وزیراعلیٰ کا انتخاب کیا جائے گا۔

گزشتہ روز اسپیکر پنجاب اسمبلی نے نجی نشریاتی ادارے سے گفتگو کرتے ہوئے کہا تھا کہ میں وزیراعلیٰ پنجاب کیلئے عمران خان کا امیدوار ہوں،اگر عمران خان کہیں تو  وزیراعلیٰ منتخب ہونے  کے بعد آدھے گھنٹے میں اسمبلی تحلیل کر دوں گا۔