کالعدم تحریک طالبان پاکستان سے مذاکرات کیلئے پشاور سے 50 رکنی جرگہ افغانستان کے دارالحکومت کابل پہنچ گیا ہے۔

تفصیلات کے مطابق 50 رکنی جرگے کے ارکان پشاور سے سی 130 کے ذریعے کابل پہنچے، جرگے کے اراکین کا کہنا ہے کہ وہ نتیجہ خیز مذاکرات کیلئے پرامید ہیں۔

جرگے میں سابق گورنر شوکت اللہ خان، جماعت اسلامی کے رہنما اور سابق ایم این اے ہارون الرشید، جے یو آئی کے سابق سینیٹر مولانا صالح شاہ، پیپلز پارٹی کے سابق رکن قومی اسمبلی اخونزادہ چٹان سمیت دیگر شامل ہیں۔

ذرائع کے مطابق جرگہ مذاکرات کا حصہ ہوگا اور اہم نکات پر افغان طالبان کی وساطت سے کالعدم ٹی ٹی پی کی قیادت سے بات چیت کرے گاـ

یاد رہے کہ کالعدم تحریک طالبان پاکستان نے حکومت پاکستان کیساتھ مذاکرات کے باعث غیرمعینہ مدت کیلئے جنگ بندی کا اعلان کر رکھا ہے۔