اسرائیلی فضائی حملوں میں ایک شہری کے زخمی ہونے اور ائیر پورٹ کا رن وے تباہ ہونے کے بعد شام کے دارالحکومت میں واقع دمشق ائیر پورٹ پر فضائی آپریشن روک دیا گیا۔

عالمی خبر رساں ادارے کی رپورٹ کے مطابق 10 جون کو اسرائیل کے شام پر فضائی حملوں کے نتیجے میں دمشق کے ائیر پورٹ کے قریب حزب اللہ کے ہتھیاروں کے 3 ڈپو کے ساتھ ساتھ ایران کے حمایت یافتہ دیگر گروپوں کو بھی نشانہ بنایا گیا۔ جس کے نتیجے میں شام کی وزارت ٹرانسپورٹ نے تکنیکی خرابی کے باعث دمشق ائیر پورٹ کے ذریعے آنے اور جانے والی پروازوں کو معطل کرنے کا اعلان کردیا تھا۔

ائیر پورٹ پر کام کرنے والے ایک ملازم نے بتایا ہے کہ فضائی آپریشن کی معطلی اسرائیلی حملوں کے باعث ائیرپورٹ کو ہونے والے نقصان کے باعث کی گئی ہے۔

عرب ایئر لائن کے ایک عہدیدار نے بتایا کہ اسرائیلی حملے کے دوران ائیر پورٹ کی لینڈنگ سائٹ کو نشانہ بنایا گیا تھا۔

یاد رہے کہ 10 جون کو شام کے سرکاری میڈیا نے جنوبی دمشق پر اسرائیلی حملوں کی اطلاع دیتے ہوئے کہا تھا کہ مقبوضہ گولان کی پہاڑیوں سے صبح ہونے سے پہلے میزائلوں کی بوچھاڑ کی گئی، شام کے فضائی دفاع نے زیادہ تر میزائلوں کو ناکارہ بنا دیا، لیکن جو اپنے ہدف تک پہنچ گئے ان سے ایک شہری زخمی ہوا اور مالی نقصان پہنچا۔