طالبان حکومت نے بھنگ مرکز قائم کرنے کیلئے آسٹریلیاء کی کمپنی کے ساتھ معاہدہ کیا ہے، جس کیلئے آسٹریلوی کمپنی 45 کروڑ ڈالر کی سرمایہ کاری کرے گی۔
تفصیلات کے مطابق طالبان اور آسٹریلوی کمپنی کے معاہدے کے تحت جنگ زدہ علاقوں میں بھنگ کے پراسیسنگ مراکز قائم کئے جائیں گے۔
افغان وزارت داخلہ کے ترجمان قاری سعید خوستی نے کہا ہے کہ بھنگ سے طبی کریم تیار کرنے والی آسٹریلوی کمپنی افغانستان میں ہزاروں ایکڑ پر کاشت بھنگ کی فصلوں تک رسائی دی جائے گی، اور معاہدے کے تحت منصوبے پرآئندہ چند روز میں عمل درآمد شروع ہوجائے گا۔
افغان میڈیا کے مطابق افغانستان کے نائب وزیرمنشیات نے دو رروز قبل کمپنی کے نمائندوں سے ملاقات کی تھی، جس میں کمپنی نے بھنگ مرکز کےمنصوبے کیلئے 45 کروڑ ڈالر کی سرمایہ کاری کا وعدہ کیا۔
یاد رہے کہ افغانستان پر کنٹرول کے بعد طالبان نے ملک بھرمیں بھنگ کی پیداوار کے خلاف کارروائی کے عزم کا اظہار کیا تھا، اور اس حوالے سے کچھ گرفتاریاں بھی کی گئی تھیں۔ کیونکہ بھنگ اورپوست کی فصلیں ماضی میں طالبان کی غیرملکی افواج کے خلاف جنگ کے دوران آمدن کا اہم ذریعہ سمجھی جاتی تھیں۔