اسرائیلی اخبار کی رپورٹ میں دعویٰ کیا گیا ہے کہ اسرائیل نے ایرانی کی فوجی قوت کے مطابق خفیہ طور پر ہتھیار خریدنا شروع کر دئیے ہیں، تاکہ تہران کے ایٹمی پروگرام کو روکا جا سکے۔
اسرائیلی اخبار یدعوت احرونوت کی ویب نیوز سروس وائی نیٹ کی رپورٹ میں بتایا گیا ہے کہ اسرائیل نے ایران پر فوجی حملہ کرنے کی تیاریاں تیز کر دی ہیں، اور فضائیہ کو مزید جنگی مشقوں کے احکامات بھی جاری کر دئیے گئے ہیں۔
رپورٹ میں بتایا گیا سینئر وزراء پر مشتمل عسکری کمیٹی کی سفارشات کے بعد اسرائیلی وزیر دفاع گینی بینٹز نے خفیہ طور پر ہتھیار خریدنے کی بھی منظوری دے دی ہے، جس کے تحت آئرن ڈوم میزائل اور جنگی طیارے خریدنے کی تجویز دی گئی ہے۔ ان خریداریوں پر 1 ارب ڈالر سے زائد کی رقم خرچ کی جائے گی۔
میڈیا رپورٹ کے مطابق اسرائیلی حکام یہ تیاریاں ایران کے عالمی طاقتوں کے ساتھ جوہری مذاکرات کی ممکنہ ناکامی کے پیش نظر کر رہے ہیں، جبکہ اسرائیلی وزیراعظم کا گذشتہ ہفتے اپنے بیان میں کہنا تھا کہ اسرائیل ایران کے عالمی طاقتوں کے ساتھ مذاکرات کا فریق نہیں، اور نہ ہی ان مذاکرات کے نتیجے میں ہونے والا کوئی معاہدہ ہمیں ایران پر حملے سے روک سکتا ہے۔ تہران نے جب بھی ایٹمی ہتھیاروں کے حصول کیلئے ریڈ لائن کراس کی تو اس کی ایٹمی تنصیبات پر فوجی کاروائی سے گریز نہیں کریں گے۔
