ایران کی وزارت خارجہ کے ترجمان نے کہا ہے کہ سرحد پر طالبان کے ساتھ جھڑپ غلط فہمی کا نتیجہ تھی۔
ایرانی وزارت خارجہ کے ترجمان سید خطیب زادے کا اپنے بیان میں کہنا تھا کہ افغانستان کے سرحدی علاقوں کے رہائشیوں کی نقل وحرکت سے غلط فہمی پیدا ہوئی، جس کے باعث سرحد پرفائرنگ کا تبادلہ ہوا۔ انہوں نے کہا کہ اب سرحد پر حالات معمول کے مطابق ہیں۔
یاد رہے کہ 2 روز قبل ایران اورافغانستان کی فورسز کی سرحدی علاقے میں جھڑپ ہوئی تھی۔ عالمی میڈیا رپورٹس کے مطابق طالبان نے ایرانی شہریوں کی جانب سے مبینہ طورپرسرحد پارکرکے افغانستان کے علاقے میں آنے پرفائرنگ کی تھی، جس کے بعد جواباً ایرانی فورسزنے طالبان فورسز پر شیلنگ کی تھی۔
دونوں ممالک کی جانب سے تصادم کی تصدیق کرتے ہوئے بتایا گیا تھا کہ کوئی جانی نقصان نہیں ہوا، لیکن مزید تفصیلات شیئر نہیں کی گئی تھیں۔
