ترک صدر رجب طیب اردوان نے کہا ہے کہ معیشت میں مندی کے باوجود کل بھی شرح سود کم رکھی، آج بھی کم رکھیں گے۔
عالمی میڈیا کے مطابق اردوان کی جانب سے سود کی شرح میں کی گئی کمی کی وجہ سے گزشتہ ماہ کے دوران لیرا کی قیمت میں تقریباً 30 فیصد کی کمی واقع ہوئی۔
اردوان نے مشرقی شہر سیرت میں اجتماع کو خطاب کرتے ہوئے کہا، انشاءاللہ، ہم قیمتوں اورغیر ملکی زرِمبادلہ کی شرحوں میں تمام اتار چڑھاو کو قلیل مدت میں مستحکم کر دیں گے
انہوں نے کہا، کل بھی شرح سود کم رکھی، آج بھی کم رکھی ہےاور کل بھی کم رکھیں گے۔ میں اس پر کبھی سمجھوتہ نہیں کروں گا کیونکہ سود ایک ایسی بیماری ہے جو امیر کو مزید امیر اور غریب کو غریب تر بنادیتی ہے۔اردوان نے کہا کہ برآمدات، کریڈٹ، ملازمتوں اور اقتصادی ترقی کو بڑھانے کے لیے سود کی شرح میں کمی کی ضرورت ہے۔
یاد رہے کہ ترکی میں بڑھتی مہنگائی، کرنسی کی قدر میں مسلسل کمی اور خراب معاشی صورتحال پر ترک صدر نے وزیر خزانہ کو عہدے سے ہٹا دیا تھا۔رپورٹس کےمطابق رواں سال اب تک ترکی کی کرنسی کی قدر میں ڈالر کے مقابلے 40 فیصد کمی ہوئی ہے جس سے مارکیٹ میں لیرا کی صورتحال انتہائی خراب ہے۔
واضح رہےکہ اس سے قبل ملک کی خراب معاشی صورتحال پر ترک صدر طیب اردوان نے مرکزی بینک کے ڈپٹی گورنر کو بھی برطرف کیا تھا۔
