عرب فوجی اتحاد نے یمنی شہر صنعا میں فوجی کاروائی میں حوثی باغیوں کے اسلحے کا بڑا ذخیرہ تباہ کرنے کا دعویٰ کیا ہے۔
عرب فوجی اتحاد کے ترجمان کے مطابق گذشتہ 24 گھنٹوں میں حوثی باغیوں کے ہتھیاروں کے زیر زمین گوداموں پر حملے کئے گئے، جہاں سے دیگر محاذوں پر لڑائی کیلئے اسلحے کی سپلائی کی جاتی تھی، ترجمان کے مطابق حملے میں اسلحہ ڈپو کو مکمل طور پر تباہ کر دیا گیا ہے۔
عرب فوجی اتحاد کے مطابق حملوں میں عام شہریوں اور شہری تنصیبات کو نقصان سے بچانے کیلئے تمام ضروری احتیاطی تدابیر پیشگی اختیار کی گئی تھیں۔
یاد رہے کہ گذشتہ 3 روز کی کاروائیوں میں عرب فوجی اتحاد کی جانب سے مختلف کاروائیوں میں 200 سے زائد حوثی باغیوں کی ہلاکت اور درجنوں فوجی گاڑیاں تباہ کرنے کا دعویٰ کیا گیا ہے۔