عرب فوجی اتحاد نے رواں ہفتے مختلف کاروائیوں میں درجنوں دیہات حوثی باغیوں کے قبضے سے چھڑوا لئے ہیں، اتحاد نے حوثی باغیوں کے بھاری جانی اور مالی نقصان کا دعویٰ بھی کیا ہے۔

یمن کے مغربی ساحل پر کاروائیوں میں عرب فوجی اتحاد نے گذشتہ روز مغربی صوبے تعز میں جبل قبنہ اور حدیجہ اور الطفیلی کے دیہات کو حوثی باغیوں کے قبضے سے آزاد کرانے کا دعویٰ کیا ہے۔ علاوہ ازیں اتحاد نے مقبنہ ضلع کے شمال میں حوثیوں کی چیک پوائنٹ پر بھی کنٹرول حاصل کر لیا ہے۔

عرب اتحاد نے حوثیوں باغیوں کے خلاف کاروائی میں بھاری اور درمیانے ہتھیاروں کا استعمال کیا، جس میں ایرانی ملیشیاء کے درجنوں جنگجو ہلاک جبکہ متعدد زخمی ہو گئے اور بڑی مقدار میں فوجی ساز و سامان تباہ ہو گیا۔ عرب اتحاد نے قبضے سے چھڑوائے گئے علاقوں کی ویڈیوز بھی جاری کی ہیں۔

یاد رہے کہ عرب فوجی اتحاد نے گذشتہ 2 روز کے دوران تعز صوبے کے ضلع مقبنہ میں بھی 9 دیہات حوثی باغیوں کے قبضے سے آزاد کرانے کا دعویٰ کیا تھا۔

یہ بھی واضح رہے کہ رواں ہفتے عرب اتحاد کی کاروائیوں میں 400 سے زائد حوثی باغی ہلاک جبکہ ان کء متعدد اسلحہ ڈپو تباہ کر دئیے گئے تھے۔