آج قومی اسمبلی کے اجلاس کے دوران اپوزیشن جماعتوں نے پیٹرولیم مصنوعات کی قیمتوں میں اضافے پر سخت احتجاج ریکارڈ کراتے ہوئے بائیکاٹ کا اعلان کردیا، جس کے بعد اجلاس غیر معینہ مدت کیلئے ملتوی کردیا گیا۔
مسلم لیگ ن کے خواجہ آصف نے دوران خطاب اسپیکر قومی اسمبلی کو مخاطب کرتےہوئے کہا کہ عوام پر پیٹرول بم گرا دیا گیا ہے، خدارا عوام پر رحم کریں۔جس کے بعد اپوزیشن کے اراکین اسمبلی نے احتجاجاً اسپیکر ڈائس کا گھیراؤ کرلیا اور بائیکاٹ کا اعلان کیا۔
احتجاج کے دوران اپوزیشن کے اراکین اسمبلی نے ہاتھوں میں احتجاجی بینرز اٹھا رکھے تھے اور اپنی نشستوں پر کھڑے ہو کر حکومت کے خلاف نعرے بازی کر رہے تھے۔اپوزیشن جماعتوں کے شدید احتجاج کی وجہ قومی اسمبلی کا اجلاس غیر معینہ مدت کیلئے ملتوی کردیا گیا۔
