سپریم کورٹ نے منہدم کئے جانے والے نسلہ ٹاور کی منظوری دینے کے خلاف مقدمہ درج کرنے کا حکم دے دیا ہے۔

تفصیلات کے مطابق آج سپریم کورٹ کی کراچی رجسٹری میں نسلہ ٹاور کو منہدم کرنے کے کیس کی سماعت ہوئی، دوران سماعت اٹارنی جرل نے بتایا کہ نسلہ ٹاور کے متاثرین کو نہ سندھ حکومت معاوضہ دے رہی ہے، نہ ہی بلڈر معاوضہ دے رہے ہیں، جس پر عدالت نے حکم جاری کیا کہ نسلہ ٹاور کی زمین کو فوری تحویل میں لیا جائے، اور اس کی واپسی متاثرین کو معاوضے کی ادائیگی سے مشروط کردیا۔

سپریم کورٹ نے نسلہ ٹاور کے بلڈنگ پلان کی منظوری دینے والے سرکاری  افسران کے خلاف بھی محکمہ جاتی اور کریمنل کارروائی کا حکم دیتے ہوئے کہا کہ محکمہ اینٹی کرپشن ان افسران کے خلاف مقدمہ درج کرے۔عدالت نے سندھ بلڈنگ کنٹرول اتھارٹی کے ڈی جی اور دیگر افسران کے خلاف فیروز آباد تھانے میں مقدمہ درج کرنے کی ہدایت کی اور اینٹی کرپشن حکام کو بھی ذمہ دار افسران کے خلاف الگ مقدمہ درج کرنے کی ہدایات جاری کیں۔عدالت نے ڈی جی سندھ بلڈنگ کنٹرول اتھارٹی کو توہین عدالت کا نوٹس جاری کرتے ہوئے کمشنر کراچی کو 15 روز میں نسلہ ٹاور مکمل طور پر منہدم کرنے کے احکامات جاری کر دئیے۔