صوبہ بلوچستان کے دارالحکومت کوئٹہ میں جناح روڈ پر سائنس کالج کے قریب  بم دھماکہ ہوا ہے، جس کے نتیجے میں 4 افراد جاں بحق ہوگئے ہیں۔

مشیر داخلہ ضیاء لانگو کا کہنا ہے کہ ابتدائی معلومات کے مطابق یہ دھماکہ ریموٹ کنٹرول ڈیوائس کے ذریعے کیا گیا، مزید تحقیقات کی جا رہی ہیں، دہشت گردوں کا مقصد عوام کو نشانہ بنانا ہے، امن کے دشمن اپنے مذموم مقاصد میں کامیاب نہیں ہوسکتے، اور نہ ہی دہشت گردی کے خلاف جنگ میں قوم کے حوصلے پست کئے جا سکتے ہیں۔

ابتدائی معلومات کے مطابق  سائنس کالج میں سیاسی جماعت کی سرگرمی تھی، جسے مبینہ طور پر نشانہ بنایا گیا۔

کوئٹہ پولیس کا کہنا ہے کہ دھماکے میں 15 افراد زخمی بھی ہوئے ہیں، جنہیں ہسپتال پہنچا دیا گیا ہے، اور حادثے کی تحقیقات شروع کر دی گئی ہیں۔

وزیراعلیٰ بلوچستان میر عبدالقدوس بزنجو نے کوئٹہ بم دھماکے کی مذمت کرتے ہوئے آئی جی بلوچستان سے رپورٹ طلب کرلی ہے۔