تفصیلات کے مطابق الیکشن کمیشن آف پاکستان نے پاکستان تحریک انصاف کے رہنماء اور رکن قومی اسمبلی فرخ حبیب کی درخواست منظور کر تے ہوئے مسلم لیگ (ن) اور پیپلز پارٹی کے پارٹی اکاؤنٹس کا جائزہ لینے کی اجازت دے دی ہے۔
فیصلے کے بعد اسلام آباد میں الیکشن کمیشن کے دفتر کے باہر پریس کانفرنس کرتے ہوئے وزیر مملکت برائے اطلاعات و نشریات فرخ حبیب نے کہا کہ اب پی ٹی آئی کے فنانشنل ماہرین اور چارٹرڈ اکاؤنٹنٹ دونوں سیاسی جماعتوں کے اکاؤنٹس کی جانچ پڑتال کر سکیں گے اور آنے والے دنوں میں ہوشربا انکشافات ہوں گے کیونکہ مسلم لیگ (ن) اپنے اکاؤنٹس چھپانا چاہتی تھی، اب پیپلز پارٹی کے چیئرمین بلاول بھٹو زرداری کو معلوم ہو گا کہ ان کی پارٹی کے کتنے جعلی اکاؤنٹس ہیں۔
یہ دونوں پارٹیاں 4 سال سے اپنے اکاؤنٹس چھپا رہی تھیں۔
ن لیگ اور پیپلز پارٹی فارن فنڈنگ کیس میں چار سال سے پارٹیز اکاؤنٹس کے ریکارڈ تک رسائی کی مخالفت کررہی تھی۔ الیکشن کمیشن نے آج فیصلہ میں چاٹرڈ اکاؤنٹنٹ اور مالیاتی ایکسپرٹ کو ن لیگ اور پیپلز پارٹی کے ریکارڈ تک رسائی منظور کرلی ہے۔ pic.twitter.com/e2NeXtiGNf
— Farrukh Habib (@FarrukhHabibISF) October 11, 2021
وزیر مملکت کا مزید کہنا تھا کہ ہم تمام حقائق قوم کے سامنے رکھیں گےکہ کسطرح ن لیگ کے اکاؤنٹس منی لانڈرنگ میں بھی استعمال ہوئے ہیں۔ ان کا کہنا تھا کہ اسٹیٹ بینک آف پاکستان کے مطابق پیپلز پارٹی کے 7 اورمسلم لیگ (ن) کے 12 اکاؤنٹس ہیں جن کا دونوں پارٹیوں کے پاس کوئی ریکارڈ نہیں۔
ان جماعتوں نے ہمیشہ اپنے آپ کو قانون سے بالاتر سمجھا ہے اور اب دونوں اسی گڑھے میں گر گئے جہاں ہمیں گرانا چاہتے تھے۔
