ہیری پوٹر سے شہرت کی بلندیوں پر پہنچنے والی ہالی وڈ اداکارہ ایما واٹسن کو فلسطینیوں کی حمایت کرنے پر اسرائیلی سفیروں اور سیاست دانوں نے انہیں یہود دشمن قرار دے دیا ہے۔
تفصیلات کے مطابق ایما واٹسن نے گذشتہ روز انسٹا گرام پر ایک پوسٹ شیئر کی، جس میں فلسطینیوں کے ساتھ اظہار یکجہتی کیا گیا تھا، پوسٹ شیئر ہوتے ہی مغربی اور اسرائیلی میڈیا نے اس کی ہیڈ لائنز بنا کر خبریں شائع کر دیں، اور یوں یہ پوسٹ وائرل ہو گئی۔
ایما واٹسن کی پوسٹ پر انہیں مسلم اور اعتدال پسند کمیونٹی کی جانب سے بہت سراہا گیا، لیکن یہودیوں کو یہ انداز بالکل پسند نہ آیا، اور اسرائیلی سیاستدانوں اور سفیروں نے انہیں یہود دشمن قرار دے دیا۔
فلسطینیوں کی حمایت کو تنقید کا نشانہ بناتے ہوئے امریکہ میں اسرائیل کے سفیر جلعاد اردن نے کہا کہ ایما واٹس کا اقدام کھلی یہود دشمنی ہے۔ انہوں نے کہا کہ فلسطینیوں کی تحریک کی حمایت کرنا یہود دشمنی ہے، اور ہالی وڈ اداکارہ نے یہی کیا ہے۔
10 points from Gryffindor for being an antisemite.@EmmaWatson pic.twitter.com/Qaqkx36JSg
— Ambassador Danny Danon | דני דנון (@dannydanon) January 3, 2022
یاد رہے کہ 31 سالہ ایما واٹسن 2014ء کے اقوام متحدہ میں خواتین کی خیر سگالی کی سفیر بھی ہیں۔ ان سے قبل کئی ہالی وڈ اداکار اور دیگر شخصیات بھی فلسطینیوں کی حمایت کر چکی ہیں، گذشتہ برس ماڈل بیلا حدید کو بھی فلسطینیوں کی حمایت کرنے پر یہود دشمن قرار دیا گیا تھا۔
