پی ٹی آئی کارکنوں کو گرفتار کرکے پنجاب پولیس نے انتہاکر دی، بیرسٹر سیف

21  اپریل‬‮  2024

خیبرپختونخوا  کے مشیر اطلاعات بیرسٹر محمد علی سیف نے ضمنی الیکشن سے پہلے پی ٹی آئی کارکنوں کو گرفتار  کرنے کی شدید الفاظ میں مذمت کی ہے۔

اپنے ایک بیان میں بیرسٹر محمد علی سیف کا کہنا تھا کہ ضمنی الیکشن سے قبل پی ٹی آئی رہنماؤں اور کارکنوں کو گرفتار کرکے پنجاب پولیس نے انتہاکر دی، ہمارے کارکنوں پر جھوٹے مقدمے درج کیے گئے ہیں۔

تحریک انصاف کے ترجمان رؤف حسن نے  پریس کانفرنس کرتے ہوئے کہا کہ آر اوز سے خالی کاغذات پر دستخط کرائے جارہےہیں ، نہ ماننے والے آر اوز کو پکڑ کر تشدد کیا جا رہا ہے،  ضمنی الیکشن میں بڑا سرپرائز دینے کی کوشش کریں گے۔

اس کے علاوہ بانی پی ٹی آئی عمران خان کی بہن علیمہ خان نے لاہور میں میڈیا سے گفتگو کرتے ہوئے عوام سے اپیل کی کہ ضمنی الیکشن میں بالکل اسی طرح نکلیں جس طرح 8 فروری کو ظلم کے خلاف نکلے تھے۔

انہوں نے کہا کہ پی ٹی آئی کے وکلا پولنگ اسٹیشنوں سے ریٹرننگ افسران کے دفاتر تک نتائج کی حفاظت کریں۔

واضح رہے کہ ملک میں قومی و صوبائی اسمبلی کے 21 حلقوں میں ضمنی الیکشن کے لیے ووٹنگ آج ہوگی۔

قومی اسمبلی کی 5 اور صوبائی اسمبلی کی 16 نشستوں پر ووٹنگ صبح 8 بجے شروع ہوگی۔ قومی اسمبلی کے جن حلقوں میں ضمنی انتخاب ہورہا ہے ان میں پنجاب کے 2، خیبر پختون خوا کے 2 اور سندھ کا ایک حلقہ شامل ہے۔

سب سے زیادہ مقبول خبریں


About Us   |    Contact Us   |    Privacy Policy

Copyright © 2021 Sabir Shakir. All Rights Reserved