سپارکو کا تیار کردہ پاکستان کا روور چاند پر چینی مشن کے ساتھ تحقیق میں حصہ لےگا۔

 اسپیس اینڈ اپر ایٹموسفیئر ریسرچ کمیشن (سپارکو) نے چین کے چانگ ای 8 مشن کے ساتھ ایک انقلابی مشن میں شراکت داری کا اعلان کیا ہے، جس کی لانچنگ 2028 میں متوقع ہے۔

سپارکو  کے مطابق یہ تعاون پاکستان کے خلائی پروگرام کے لیے ایک اہم سنگ میل کی حیثیت رکھتا ہے، کیونکہ سپارکو کا مقامی طور پر تیار کردہ روور اس مشن میں چاند کی سطح کو دریافت کرنے کے لیے شامل ہوگا۔

سپارکو کا کہنا ہےکہ  روور  جس کا وزن تقریباً 35 کلوگرام ہے، چین کے چانگ ای 8 مشن کا حصہ ہوگا، جو بین الاقوامی قمری تحقیقاتی اسٹیشن (ILRS) منصوبے کا ایک حصہ ہے۔ یہ روور چاند کےقطب  جنوبی پر اترے گا  جو کہ اپنی دشوار گزار زمین اور ممکنہ سائنسی دریافتوں کے لیے جانا جاتا ہے۔ اس مشن کا مقصد چاند کی سطح کا مطالعہ، سائنسی تحقیق کرنا اور مستقبل کے قمری اور سیاروں کی کھوج کے لیے جدید ٹیکنالوجی کا تجربہ کرنا ہے۔

سپارکو کے مطابق اس مشن میں مختلف سائنسی تجربات شامل ہوں گے، جن میں چاند کی مٹی کا مطالعہ، چاند کی سطح کا نقشہ بنانا اور چاند پر انسانوں کی پائیدار موجودگی کے لیے نئی ٹیکنالوجی کی آزمائش شامل ہے۔ سپارکو کا روور جدید ترین سائنسی آلات سے لیس ہوگا  جو کہ اہم ڈیٹا اکٹھا کرنے میں معاون ثابت ہوگا، جو مستقبل کے قمری مشنز کی راہ ہموار کرسکتا ہے۔

سپارکو کا کہنا ہے کہ چین کے ساتھ یہ تعاون دونوں ممالک کے مضبوط دو طرفہ تعلقات اور خلائی تحقیق کے مشترکہ وژن کو اجاگر کرتا ہے۔