سعودی عرب میں نشہ آور اشیا سمگل کرنے الزام میں 7 پاکستانی کو گرفتار کر لیا گیا ہے۔
سعودی عرب کی محکمہ انسداد منشیات کے مطابق گرفتار ملزمان سے 20 کلو گرام سے زائد نشہ آور مادہ برآمد ہوا۔ ترجمان محکمہ انسداد منشیات کا کہنا ہے کہ گرفتار افراد میں سے 6 کے پاس اقامہ اور ایک وزٹ ویزا رکھتا ہے۔ترجمان کے مطابق ملزمان کو مقدمہ درج کرکے ادارہ پراسیکیوشن کے حوالے کر دیا گیا ہے۔
دوسری طرف ایک رپورٹ جاری کی گئی ہے۔سعودی عرب میں زکوٰۃ، ٹیکس اور کسٹمز اتھارٹی نے 2021 کے دوران 190 ملین سے زائد نشہ آور گولیاں ضبط کرنے کا انکشاف کیا ہے جن میں سے زیادہ تر کیپٹاگون گولیاں تھیں۔اتھارٹی نے متعلقہ حکام کے ساتھ تعاون اور ہم آہنگی سے تقریباً 37,000 کلو گرام منشیات جس میں چرس، ہیروئن، کوکین، قات اور دیگر ضبط کرنے میں کامیابی حاصل کی۔
اس کے علاوہ سرکاری اعداد و شمار کے مطابق 234,000 سے زائد شراب کی بوتلیں اور 4,155 لیٹر شراب ضبط کی گئی۔اتھارٹی نے تجارتی دھوکہ دہی اور جعلسازی کے رجحان کو روکنے کے لیے درآمدات پر کنٹرول سخت کرنے کے لیے کسٹم آؤٹ لیٹس کے ذریعے اپنی کوششوں میں 3.9 ملین سے زائد جعلی اشیاء ضبط کرنے کا اعلان کیا۔یہ کارروائی 41 کسٹم بندرگاہوں میں کام کرنے والی ٹیموں کی اعلیٰ کارکردگی کو ظاہر کرتا ہے۔ منشیات اور دیگر ممنوعہ اشیا کی اسمگلنگ کے لیے جدید آلات، سنیفر ڈاگزاور دیگر طریقے استعمال کیے گئے۔
