وزیراعظم عمران خان نے سانحہ مری کی تحقیقات کرنے والی کمیٹی کو حقائق جلد سامنے لانے کیلئے ہدایات جاری کی ہیں۔
تفصیلات کے مطابق آج وزیراعظم کی زیرصدارت حکومتی رہنماؤں اور ترجمانوں کا اجلاس منعقد ہوا ، جس میں شرکاء کوموجودہ سیاسی صورتحال اور سانحہ مری پر بریفنگ دی گئی۔ اجلاس میں الیکشن کمیشن میں زیرسماعت فارن فنڈنگ کیپر بھی تبادلہ خیال کیا گیا، مشیر برائے پارلیمانی امور ڈاکٹربابر اعوان اوروزیر مملکت برائے اطلاعات و نشریات فرخ حبیب کی طرف سے فارن فنڈنگ کیس پر بریفنگ دی گئی، جبکہ وزیرخزانہ شوکت ترین نے معاشی صورتحال پر بریف کیا۔
اجلاس میں گفتگو کرتے ہوئے ڈاکٹر بابر اعوان نے کہا کہ ہم نے اپنے ڈونرز کی مکمل تفصیلات الیکشن کمیشن کو فراہم کیں، الیکشن کمیشن دوسری جماعتوں کے فنڈنگ ذرائع بھی سامنے لائے، انہوں نے کہا کہ فنانس سپلیمنٹری بل اسی ہفتے اسمبلی سے منظور کروائیں گے۔
پنجاب حکومت کے ترجمان حسان خاور نے اجلاس کے شرکاء کو سانحہ مری پر بریفنگ دی، جس پر وزیراعظم نے کہا کہ کمیٹی جلد از جلد سانحہ مری کے حقائق سامنے لائے، سیاحتی مقامات پر ساری چیزوں کو ریگولیٹ کرنے کی ضرورت ہے، مری میں انفراسٹرکچر کی کمی کو دور کرنے پر زور دیا جائے، جدید طریقے سے سارے معاملے کو ہینڈل کیا جائے۔
