وفاقی وزیر اطلاعات فواد چوہدری نے کہا ہے وفاقی کابینہ نے فیصلہ کیا ہے کہ نواز شریف کی واپسی کیلئے ان کے گارنٹر شہباز شریف کے خلاف لاہور ہائیکورٹ سے رجوع کیا جائے گا۔
آج وفاقی کابینہ کے اجلاس کے بعد پریس کانفرنس میں وفاقی وزیر اطلاعات فواد چوہدری نے کہا کہ نواز شریف کی صحت کا ڈرامہ رچایا گیا جو درست نہیں، وہ ایک فرڈ تھا، اب وفاقی کابینہ نے اس معاملے پر شہباز شریف کے خلاف لاہور ہائیکورٹ سے رجوع کرنے کا فیصلہ کیا ہے۔انہوں نے کہا کہ نوازشریف نے لندن قیام میں 17 مہینے کے دوران کوئی علاج نہیں کرایا، انہوں نے جو رپورٹس بھیجی ہیں انہیں حکومت پنجاب نے مسترد کردیا ہے، ان کا باہر جانا علاج کیلئے نہیں بلکہ ایک فراڈ تھا اور اس فراڈ میں شہبازشریف برابر کے شریک ہیں۔ ان کا کہنا تھا کہ نواز شریف باہر بیٹھ کر ریاست اور قوانین کا مذاق اڑا رہے ہیں۔
نواز شریف فراڈ کرکے پاکستان سے باہر گئے اور اب وہاں بیٹھ کر قانون کا مذاق اڑا رہے ہیں جبکہ شہباز شریف نے انکی واپسی کی ضمانت لی تھی۔ شہباز شریف کے جھوٹے بیان حلفی پر وفاقی کابینہ نے ہائیکورٹ سے رجوع کرنے کا فیصلہ کیا ہے۔ وفاقی وزیر @fawadchaudhry pic.twitter.com/w2fGrGsvsw
— PTI (@PTIofficial) January 11, 2022
وفاقی وزیر اطلاعات کا کہنا تھا کہ نوازشریف کی فیملی سے پاکستانی ہائی کمیشن نے رابطہ کیا لیکن انہوں نے ہائی کمیشن کو رپورٹس نہیں دیں، پاکستانی سفارتخانے نے دو بار رابطہ کیا مگر انہوں نے جواب نہیں دیا، اب ضروری ہے کہ شہبازشریف اپنے بیان کے مطابق نوازشریف کو پاکستان لانے کے اقدامات کریں۔
وفاقی وزیر اطلاعات کا کہنا تھا کہ ہم عدالت میں یہ درخواست کریں گے کہ شہبازشریف نوازشریف کو واپس لائیں، اور ایسا نہ کرنے کی صورت میں انہیں نااہل قراردیا جائے۔
