اقوام متحدہ کے ادارے یونیسیف کے نائب سربراہ عمر عابدی نے کہا ہے کہ طالبان نے انہیں بتایا وہ بہت جلد ملک بھر میں چھٹی جماعت سے میٹرک تک لڑکیوں کی تعلیم کے لیے اسکول کھولنے کا اعلان کردیں گے۔
یونیسیف کے ڈپٹی ایگزیکیٹو ڈائریکٹر عمر عبدی نے گزشتہ ہفتے افغانستان کا دورہ کیا اور بچوں کی صحت، تعلیم، خوراک اور مستقبل کے حوالے سے طالبان حکومت کے نمائندوں سے گفتگو کی۔ آج اقوام متحدہ کے ہیڈکوارٹرز میں صحافیوں سے بات کرتے ہوئے ان کاکہنا تھا کہ افغانستان کے 5 صوبوں میں پہلے ہی لڑکیوں کو سیکنڈری اسکول جانے کی اجازت دے دی گئی ہے، طالبان حکومت بچیوں کے ماڈل سیکنڈری اسکول کے قیام پر بھی کام کر رہی ہے، جو تمام لڑکیوں کو چھٹی جماعت سے آگے اپنی تعلیم جاری رکھنے کی اجازت دے گا تاہم اس پر ایک سے دو ماہ میں عمل درآمد ہونا ممکن ہوگا۔
