پی ٹی آئی حکومت نے شوکت ترین کو وزیراعظم کا مشیر خزانہ مقرر کر دیا ہے جس کا نوٹیفکیشن بھی جاری کر دیا گیا۔
نوٹیفکیشن میں بتایا گیا ہے کہ شوکت ترین کا عہدہ وفاقی وزیر خزانہ کے برابر ہوگا۔اس سے قبل شوکت ترین وفاقی وزیر خزانہ کے عہدے پر کام کر رہے تھے تاہم ان کی مدت ہفتے کے روز ختم ہو گئی تھی۔ شوکت ترین نے 17اپریل 2021 ء کو وفاقی وزیر خزانہ کا حلف اٹھایا تھا۔
آئین پاکستان کے تحت عوامی نمائندہ منتخب ہوئے بغیر کسی شخص کو 6 ماہ کیلئے وفاقی وزیر کے عہدے پر فائز کیا جا سکتا ہے تاہم کابینہ میں مستقل رہنے کیلئے غیر منتخب شخص کو سینیٹر یا قومی اسمبلی کا رکن بننا ضروری ہے۔ وزیر اعظم عمران خان نے اپنےخصوصی اختیارات کا استعمال کرتے ہوئے شوکت ترین کو وزیرخزانہ مقرر کیا تھا۔
شوکت ترین ان دنوں امریکہ میں موجود ہیں، انہوں نے آئی ایم ایف سے مذاکرات کے حوالے سے کہا کہ عالمی مالیاتی ادارے کے ساتھ مذاکرات کامیابی سے جاری ہیں، ناکامی سے متعلق تاثر غلط، قوم کو ناامید نہیں ہونا چاہیے، مہنگائی کم کرنے کیلئے کام کر رہے ہیں، معیشت میں بہتری آ رہی ہے تاہم تھوڑا وقت درکار ہے۔