وفاقی وزیرداخلہ شیخ رشید کا کہنا ہے کہ کہ پی ڈی ایم والے اب 23 مارچ کو ہی اسلام آباد آئیں، مزید ڈیڑھ سال خوار ہوں گے۔
دارالحکومت اسلام آباد میں ایک تقریب سے خطاب کرتے ہوئے وفاقی وزیر داخلہ شیخ رشید نے کہا کہ ساڑھے 3 سال میں ایک بھی بل پر اپوزیشن عمران خان کو شکست نہیں دے سکی، اپوزیشن شور ڈالتی تھی کہ استعفیٰ دے دیں گے، پھر اپوزیشن عدم اعتماد سے بھی بھاگ گئی۔
وزیر داخلہ نے کہا کہ قوم اپوزیشن کی سوچوں سے واقف ہے، آپ اسمبلیوں میں آکر اپنی طاقت کا اظہار کریں، آپ نے سڑکوں کا انتخاب کیا، 23 مارچ کو بھی آکر دیکھ لیں، ڈیڑھ سال بھی خوار ہوں گے۔
شیخ رشید کا کہنا تھا کہ مولانا فضل الرحمان نے غیر ذمہ دارانہ بات کی کہ ہم وزیراعظم کو مکھی کی طرح نکال دیں گے، میں انہیں کہتا ہوں وہ اپنی طرف دیکھیں آپ کو صرف میڈیا نے زندہ رکھا ہوا ہے، اپوزیشن والے کہتے تھے ہم استعفے دیں گے لیکن یہ وہاں سے بھی بھاگے، ساڑھے 3 سال تک اپوزیشن اسمبلی میں کسی ایک بل یا قرارداد پر حکومت کو شکست نہیں دے سکی، 23 مارچ کو بھی اکر دیکھ لیں، اس دن بھی آپ کو شکست ہوگی۔
وزیرداخلہ نے کہا کہ پی ڈی ایم کو کہتا ہوں کہ اپنی بات سے پیچھے نہ ہٹے اور 23 مارچ کو ہی اسلام آباد آئے، ایک 27 فروری دوسرا 23 مارچ کو آکر دیکھ لو کچھ نہیں ملے گا، یہ لوگ سڑکوں پر ذلیل و خوار ہوں گے، سڑکوں پر آنے کی کوئی وجہ ہونے چاہیے، ٹریکٹر ٹرالی مارچ میں کتنے لوگ نکلے، وہ بھی بری طرح ناکام ہوئے، عمران سڑکوں پر آیا تو بہت زیادہ خطرناک ہوگا۔
سانحہ مری پر بات چیت کرتے ہوئے شیخ رشید نے کہا کہ مری واقعے پر ہمیں افسوس ہے، میں 2 راتیں وہاں رہا، جو کچھ ہوا گاڑی میں گیس کی وجہ سے ہوا، ہم اپنی غلطی مانتے ہیں، مشینیں وہاں کیوں کھڑی تھی کام ہونا چاہیے تھا، میں صبح 3 بجے تک کھڑا تھا، 700 گاڑیوں کو مری سے نکالا۔
شیخ رشید نے کہا کہ راولپنڈی میں نالہ لئی کے ساتھ رنگ روڈ ماں بچہ اسپتال بنے گا، میں رنگ روڈ دیکھنے جاؤں گا، باتیں کرنا آسان کام کرنا مشکل ہے۔