وزیراعلیٰ پنجاب سردار عثمان بزدار نے کہا ہے کہ اپوزیشن انتشار پھیلا کر اپنے منفی عزائم کی تکمیل چاہتی ہے۔

وزیراعلیٰ عثمان بزدار نے اپنے جاری کردہ بیان میں کہا کہ افسوس کا مقام ہے کہ اپوزیشن عناصر ملکی مفادات کو بالائے طاق رکھ چکے ہیں۔انہوں نے کہا کہ اپوزیشن کا ایجنڈا پاکستان کے مفادات سے متصادم ہے، اپوزیشن انتشار پھیلا کر اپنے منفی عزائم کی تکمیل چاہتی ہے۔

عثمان بزدار نے کہا کہ اپوزیشن نے ہر موقع پر منفی سیاست کی اور یہ عوام میں بے نقاب ہو چکے ہیں۔وزیراعلیٰ پنجاب کا کہنا ہے کہ وزیراعظم عمران خان کی قیادت میں تحریک انصاف کی حکومت کو 5 برس کا مینڈیٹ ملا ہے، حکومت مدت پوری کرے گی اور سازشی عناصر پہلے کی طرح روتے رہیں گے۔انہوں نے مزید کہا کہ پاکستانی عوام عاقبت نا اندیش عناصرکے جھانسے میں نہیں آئیں گے، مسرد شدہ عناصر کے عزائم پہلے کی طرح ناکام رہیں گے۔

سپرلیگ7  پر بات کرتے ہوئےوزیراعلیٰ پنجاب عثمان بزدار نے کہا ہے کہ سپرلیگ7 سے دنیا کو یہ پیغام جا رہا ہے کہ پاکستان ایک پر امن ملک ہے۔وزیراعلیٰ پنجاب عثمان بزدار نے پاکستان سپر لیگ7 کے آغاز پر مبارکباد دیتے ہوئے کہا کہ میچز سے شائقین کرکٹ کو بہترین تفریح کا موقع ملے گا۔پاکستان کے عوام کھیلوں بالخصوص کرکٹ سے محبت کرتے ہیں،لاہور میں ہونے والے میچوں کیلئے بہترین انتظامات کو یقینی بنایا جائے گا۔