بھارت میں جنسی درندوں نے سفاکیت کی انتہا کرتے ہوئے پہلے دوسالہ بچے کی ماں کو نہ صرف اجتماعی زیادتی کا نشانہ بنایا گیا بلکہ منہ پر کالک مل کر اور گلے میں جوتوں کا ہار پہنا کے اسے سڑکوں پر گھماتے رہے۔
بھارتی میڈیا کے مطابق یہ واقعہ دارالحکومت دہلی کے علاقے کستربا نگر میں پیش آیا، جس کی ویڈیو سوشل میڈیا پر وائرل ہونے کے بعد پولیس حرکت میں آئی، اور متاثرہ لڑکی کو اس کے بیٹے کے ہمراہ نیم بے ہوشی کے عالم میں محفوظ مقام پر منتقل کیا۔
سوشل میڈیا پر وائرل ویڈیو میں دیکھا جا سکتا ہے کہ خواتین کا ایک جتھا ایک لڑکی کو تشدد کا نشانہ بنا رہا ہے، جبکہ دیگر خواتین اس کی ویڈیو بنا رہی ہوتی ہیں۔
بھارتی میڈیا کے مطابق اس کیس میں تاحال چند خواتین سمیت 11 افراد کو حراست میں لیا گیا ہے، اور یہ تمام افراد متاثرہ لڑکی کے پڑوسی ہیں۔
میڈیا رپورٹس کے مطابق ملزمان کے گھر میں سے ایک 16 سالہ نوجوان نے اس 20 سالہ شادی شدہ لڑکی کو شادی کی پیشکش کی تھی، جسے اس نے ٹھکرا دیا تھا، جس سے دلبرداشتہ ہو کر مبینہ طور پر لڑکے نے ٹرین کے سامنے آ کر خود کشی کر لی تھی۔
متاثرہ لڑکی نے پولیس کو بتایا ہے کہ اسے پڑوسیوں نے اغواء کیا، اور ان کے تمام مردوں اور نو عمر لڑکوں نے جو کہ منشیات کا کاروبار بھی کرتے ہیں، اور خود بھی نشے کے عادی ہیں نے مجھے ریپ کا نشانہ بنایا۔ ان کی فیملی کی دیگر خواتین وہاں موجود تھیں، جو اپنے مردوں سے کہہ رہی تھیں کہ وہ سب میرے ساتھ ریپ کریں۔ لڑکی کا مزید بتانا تھا کہ پھر انہی پڑوسیوں کی خواتین نے میرے بال کاٹے، میرے منہہ پر کالا رنگ کیا، مجھے جوتوں کے ہار پہنا کر گلیوں میں گھمایا گیا، اور جگہ جگہ روک کر مجھے تشدد کا نشانہ بنایا گیا۔
دہلی پولیس کا کہنا ہے کہ ابتدائی تحقیقات سے یہ بات سامنے آئی ہے کہ یہ واقعہ ذاتی دشمنی کا شاخسانہ لگتا ہے، لڑکی کو کسی رنجش کی بنا پر انتقام کا نشانہ بنایا گیا، کیس کی مزید تحقیقات کی جا رہی ہیں۔
نئی دہلی کے خواتین کمیشن کی سربراہ سواتی ملیوال نے متاثرہ لڑکی سے ملاقات کے بعد مطالبہ کیا ہے کہ ہمیں گرفتاریاں نہیں فوری انصاف چاہیے۔
कस्तूरबा नगर में 20 साल की लड़की का अवैध शराब बेचने वालों द्वारा गैंगरेप किया गया, उसे गंजा कर, चप्पल की माला पहना पूरे इलाक़े में मुँह काला करके घुमाया। मैं दिल्ली पुलिस को नोटिस जारी कर रही हूँ। सब अपराधी आदमी औरतों को अरेस्ट किया जाए और लड़की और उसके परिवार को सुरक्षा दी जाए। pic.twitter.com/4ExXufDaO3
— Swati Maliwal (@SwatiJaiHind) January 27, 2022
