پاکستان تحریک انصاف کے رہنماء جہانگیر ترین نے کہا ہے کہ تاحیات نااہلی کے خاتمے کیلئے دی گئی درخواست سے میرا کوئی تعلق نہیں ہے۔

خیبر پختونخوا سے پی ٹی آئی کے ایم پی اے عبدالسلام آفریدی کے ہمراہ مردان میں میڈیا سے گفتگو کرتے ہوئے جہانگیر ترین کا کہنا تھا کہ تاحیات نااہلی کے خاتمے کیلئے سپریم کورٹ میں دائر کی گئی درخواست سے میرا کوئی تعلق نہیں ہے۔ انہوں نے کہا کہ یہ کیس پاکستان سپریم کورٹ بار نے دائر کیا ہے، ان کا یہ موقف ہے کہ کسی کو تاحیات نااہل کرنا انصاف کے منافی ہے۔

جہانگیر ترین کا کہنا تھا کہ نہ میں اس کیس میں فریق ہوں اور نہ ہی یہ درخواست دائر کرنے کیلئے مجھ سے مشورہ کیا گیا ہے۔

یاد رہے کہ صدر سپریم کورٹ بار احسن بھون نے چند روز قبل تاحیات نااہلی کے خلاف سپریم کورٹ میں درخواست دائر کی تھی۔ اس درخواست سے یہی تاثر لیا جا رہا ہے کہ درپردہ نوازشریف اور جہانگیر ترین کو دوبارہ سے پارلیمانی سیاست میں لانے کی کوششیں کی جا رہی ہیں۔