سابق مس امریکہ 30 سالہ چیسلی کرسٹ نے نامعلوم وجوہات کی بنا پر کثیر منزلہ عمارت سے چھلانگ لگا کر زندگی کا خاتمہ کرلیا ہے۔
عالمی خبر رساں ایجنسی کی رپورٹ کے مطابق چیسلی کرسٹ نے نیویارک کے پرتعیش علاقے منہٹن کی 60 منزلہ بلند و بالا عمارت سے چھلانگ لگائی اور موقع پر ہی ہلاک ہوگئیں۔
نیویارک پوسٹ کی رپورٹ کے مطابق چیسلی کرسٹ 60 منزلہ عمارت منہٹن میں رہائش پذیر تھیں، جبکہ ان کا فلیٹ نویں منزل پر تھا، تاہم زندگی کے آخری لمحات میں انہیں 29 ویں منزل پر دیکھا گیا۔ امریکی پولیس کے مطابق بھی چیسلی کرسٹ نے عمارت کی 29 ویں منزل سے کود کر زندگی کا خاتمہ کیا ہے۔
میڈیا رپورٹس کے مطابق چیسلی نے جس وقت عمارت سے چھلانگ لگائی، اس وقت وہ اپنے فلیٹ پر اکیلی تھیں، اور 31 جنوری کی صبح 7 بجے ان کی لاش کی تصدیق کی گئی۔
چیسلی کرسٹ نے خودکشی سے کچھ گھنٹے قبل ہی اپنی تصویر انسٹاگرام پر شیئر کرتے ہوئے ایک دلخراش پوسٹ بھی کی تھی، جس میں انہوں نے کہا کہ شاید آج کا دن میرے لئے سکون اور آرام ساتھ لے آئے۔
View this post on Instagram
سابق مس امریکہ چیسلی کرسٹ ماضی میں ڈپریشن اور ذہنی پریشانی سمیت دیگر معاملات پر کھل کر بات کرتی رہی ہیں، 2019ء میں انہوں نے خوداعتراف کیا تھا کہ وہ کافی عرصے تک ڈپریشن کا شکار رہی ہیں۔
چیسلی کرسٹ کی خود کشی پر مس ورلڈ کے ٹوئٹر ہینڈل سے بھی ان کے اہل خانہ کے ساتھ تعزیت کا اظہار کیا گیا جب کہ دنیا بھر کی حسیناؤں نے بھی ان کی موت پر گہرے دکھ کا افسوس کیا ہے۔
We are devastated to learn about the loss of Miss USA 2019 Cheslie Kryst. She was one of the brightest, warmest, and most kind people we have ever had the privilege of knowing. Our entire community mourns her loss, and our thoughts and prayers are with her family right now. pic.twitter.com/fuJHXeMnHa
— Miss Universe (@MissUniverse) January 31, 2022
نیویارک پولیس کا کہنا ہے کہ چیسلی کرسٹ کی موت خودکشی تھی یا حادثہ، پوسٹ مارٹم رپورٹ اور ابتدائی تحقیقات کے بعد وجہ سامنے آئے گی۔
یاد رہے کہ چیسلی کرسٹ 2019ء میں امریکہ کی خوبصورت ترین دوشیزہ قرار پائی تھیں، اس سے قبل ریاست کیرولینا کی خوبصورت ترین لڑکی کا ٹائٹل بھی چیسلی کے پاس رہ چکا ہے۔ وہ چند سیاہ فام دوشیزاؤں میں سے تھیں، جنہوں نے خوبصورتی کا مقابلہ اپنے نام کیا۔
