وزارت داخلہ نے پنجگور اور نوشکی میں دہشت گرد حملوں  کے بعد ملک بھر کیلئے ہائی الرٹ جاری کردیا ہے۔

تفصیلات کے مطابق ملک بھر کیلئے جاری کئے گئے وزارت داخلہ کے ہائی الرٹ میں تمام انٹیلی جنس اور قانون نافذ کرنے والے اداروں کو سیکیورٹی کے سخت انتظامات کرنے کی ہدایت کی گئی ہے۔

وزارت داخلہ نے چاروں صوبوں سمیت آزاد کشمیر کے سیکیورٹی اداروں کو غیر معمولی طور پر مستعد رہنے کی ہدایت کی ہے۔ وزارت داخلہ کا کہنا ہے کہ ایف سی کی مستعدی کا بلوچستان میں دہشت گردی کے واقعات کو ناکام بنانے میں اہم  کردار رہا۔

واضح رہے کہ 2 فروری کو  سیکیورٹی فورسز نے بلوچستان کے علاقوں پنجگور اور نوشکی میں دہشت گردوں کے حملوں کو ناکام بناتے ہوئے  علاقوں میں کلیئرنس آپریشن کیا، جس میں 13 دہشت گردہلاک ، جبکہ فائرنگ کے تبادلے میں پاک فوج کے 7 جوان شہید اور 3 زخمی ہوئے۔ وزارت داخلہ کا مراسلے میں کہنا تھا کہ پوری قوم شہداء کو سلام پیش کرتی ہے۔