وزیراعلیٰ پنجاب سردار عثمان بزدار نے جنوبی پنجاب کیلئے فرانزک لیب بنانے کا اعلان کردیا ہے۔

وزیراعلیٰ پنجاب عثمان بزدار نے اپنے بیان میں کہا ہے کہ جنوبی پنجاب کیلئے جدید ترین فرانزک لیب ڈیرہ غازی خان میں بنائی جائے گی۔

انہوں نے کہا کہ فرانزک سائنسز لیب سے پولیس، پراسیکیوشن اور عدلیہ کی معاونت ممکن ہوگی، پنجاب فرانزک سائنس ایجنسی کی خدمات کو نہ صرف ملکی بلکہ عالمی سطح پر بھی تسلیم کیا جاتا ہے۔

وزیراعلیٰ پنجاب نے کہا کہ فرانزک سائنس ایجنسی میں جدید آلات اور پروفیشنل اسٹاف ناقابل تردید حقائق فراہم کرتے ہیں، پنجاب فوڈ، ڈرگ اینڈ ایگریکلچراتھارٹی عمارت کی جلد تکمیل کیلئے بھرپور وسائل دیں گے۔

انکا کہنا تھا کہ فرانزک سائنسز ٹریننگ لیب میں خیبر پختونخوا، سندھ اور بلوچستان کے عملے کو بھی تربیت دی جائے گی۔

عثمان بزدار نے کہا کہ پنجاب فرانزک سائنس ایجنسی نے تمام ہائی پروفائل کیس ٹریس کرکے اعلیٰ کارکردگی کا مظاہرہ کیا۔

انہوں نے مزید کہا کہ سینٹرآف فرانزک سائنسز ٹریننگ لیب نہ صرف پنجاب بلکہ پورے پاکستان کیلئے ایک اعزاز ہے، لاہور میں ایک ارب 90 کروڑ روپے سے بننے والی جدید ترین ٹریننگ لیب فنکشنل کردی گئی ہے۔