کالعدم تحریک طالبان پاکستان مالاکنڈ ڈویژن کا سربراہ مفتی بورجان افغانستان کے شہرجلال آباد میں ہلاک ہوگیا ہے۔

تفصیلات کے مطابق مفتی بور جان کی گاڑی پر 19 جنوری کو افغانستان کے صوبے کنڑ میں بم حملہ کیا گیا تھا۔ ذرائع کا کہنا ہے کہ اس حملے میں گاڑی کا ڈرائیور جاں بحق جبکہ مفتی بور جان شدید زخمی ہو گیا تھا۔ ذرائع کا  کہنا ہے کہ اب مفتی بور جان بھی افغانستان کے شہر جلال آباد میں زخموں کی تاب نہ لاتے ہوئے جاں بحق ہو گیا ہے۔

ذرائع کا یہ بھی کہنا ہے کہ مفتی بور جان کی نامعلوم مقام پر تدفین کے بعد نئے کمانڈر کی تعیناتی کیلئے مشاورت شروع کر دی گئی ہے۔

یاد رہے کہ مفتی بور جان ٹی ٹی پی کے سابق سربراہ ملا فضل اللہ کا اہم ساتھی تھا، اور طالبان کی قیادت میں بھی اس کا شمار بڑے کمانڈروں میں ہوتا تھا۔

یاد رہے کہ افغانستان میں ہونے والے حالیہ حملوں کے نتیجے میں کالعدم ٹی ٹی پی کے کمانڈروں میں یہ تیسری بڑی ہلاکت ہے، اس سے قبل رفیع اللہ اور محمد خراسانی بھی مختلف حملوں میں ہلاک ہو چکے ہیں۔