وفاقی وزیر داخلہ شیخ رشید احمد نے اپنی رہائشگاہ لال حویلی کو یونیورسٹی میں تبدیل کرنے کا اعلان کردیا ہے۔
آج راولپنڈی وومن یونیورسٹی کا سنگ بنیاد رکھتے ہوئے ان کا کہنا تھا کہ لڑکے نالائق ہو گئے، جبکہ لڑکیاں آگے نکل گئی ہیں۔تقریب سے خطاب کرتے ہوئے شیخ رشید نے کہا کہ راولپنڈی میں جو بھی پلاٹ خالی نظر آئے وہاں کالج اور یونیورسٹیز بنائیں، ان شاء اللّٰہ راولپنڈی میں آئی ٹی یونیورسٹی بھی بنائیں گے۔
ان کا مزید کہنا تھاکہ لال حویلی کو بھی یونیورسٹی کا درجہ دیں گے،انہوں نے کہا کہ کوئی وظیفہ مقرر کروں گا تاکہ طالب علم پڑھ سکیں، چاہے مجھے چادر پھیلانی پڑے میں اسی سال یونی ورسٹی بناؤں گا۔ بچیوں کو باہر کی ٹاپ یونیورسٹی سے تعلیم دلانے کے لیے لال حویلی کردار ادا کرے گی۔
اس موقع پر شیخ رشید نے اپنے بارے میں بتائے ہوئے کہا کہ میرے والدین ان پڑھ تھے، میں نے اس کا بہت فائدہ اٹھایا اگر فیل بھی ہوجاتا تھا تو ماں کو کہتا تھا میں پاس ہوگیا ہوں۔انہوں نے کہا کہ اس معاشرے مین بدمعاش کو عزت ملتی جو خدمت گار ہیں ان کی کوئی عزت نہیں، ان کا کہنا تھا کہ میں لال حویلی کے سامنے کتابیں بیچا کرتا تھا۔
