اسلام آباد میں پاکستان تحریک انصاف کی کور کمیٹی کے اجلاس کے بعد ورچوئل بریفنگ میں وفاقی وزیر اطلاعات فواد چوہدری نے کہا ہے کہ پٹرولیم مصنوعات کی قیمتوں میں اضافہ ہوا ہے لیکن دالیں، سبزیاں، چینی اور آٹا سمیت دیگر اشیا ئے خوردونوش کی قیمتوں میں کمی ہو رہی ہے۔
وفاقی وزیر اطلاعات کا کہنا تھا کہ وزیراعظم نےکہا ہے کہ عوام پر پڑنے والے بوجھ کو کم کرنے کیلئے فوری طور پر اقدامات ہونے چاہئیں، اور احساس پروگرام کے تحت سبسڈی اسکیم کو مزید وسعت دی جائے۔
وزیراعظم نے متوسط طبقہ کو ریلیف کی فراہمی کے لئے فوری اقدامات کی ہدایت کی،
وزیراعظم نے احساس پروگرام کی سبسڈی سکیم کو بڑھانے کی بھی ہدایت کی
خیبر پختونخوا اور پنجاب احساس پروگرام کی سبسڈی سکیم میں حصہ دار بننے کو تیار ہیں@fawadchaudhry pic.twitter.com/XB9MVfwBAx— Fawad Chaudhry (Updates) (@FawadPTIUpdates) October 20, 2021
ان کا کہنا تھا کہ خیبرپختونخوا اور پنجاب سبسڈی اسکیم کا حصہ بننے کیلئے تیار ہیں، وفاقی حکومت چاہتی ہے کہ سندھ اور بلوچستان بھی اس اسکیم کا حصہ بنیں، اس اسکیم میں میں گلگت بلتستان اور آزاد کشمیر نے بھی دلچسپی ظاہر کی ہے۔ مزید ان کا کہنا تھا کہ حکومت مہنگائی روکنے کیلئے اقدامات کر رہی ہے، وزیراعظم بہت جلد ان اقدامات کے بارے میں اعلان کریں گے۔
سندھ حکومت گندم جاری نہیں کر رہی، اسلئے آٹا مہنگا ہو رہا ہے
وفاقی وزیراطلاعات نے ملک میں آٹے کی بڑھتی ہوئی قیمتوں کے متعلق گفتگو کرتے ہوئے کہا کہ سندھ حکومت کی جانب سے گندم ریلیز نہ کرنے کی وجہ سے مسائل پیدا ہو رہے ہیں، سندھ حکومت کی وجہ سے پنجاب اور خیبر پختونخوا میں 20 کلو آٹے کا تھیلا اصلی قیمت سے 400 روپے زائد میں فروخت ہو رہا ہے۔ وفاقی حکومت گندم کی زیادہ مقدار ریلیزکرنے کیلئے صوبائی حکومت پر دباؤ ڈال رہی ہے تاکہ آٹے کی قیمتوں میں کمی لائی جا سکے۔
