پشاور ہائیکورٹ نے وفاقی وزیر اطلاعات فواد چوہدری اور فردوس عاشق اعوان کو جسٹس وقار سیٹھ کی قبر پر جا کر معافی مانگنے کا حکم دیا ہے۔
آج پشاور ہائیکورٹ میں پرویز مشرف کو پھانسی کی سزا سنانے والی خصوصی عدالت کے جج وقار سیٹھ کے خلاف وفاقی وزراء کی پریس کانفرنس پر توہین عدالت کیس کی سماعت ہوئی۔ وفاقی وزیر اطلاعات فواد چوہدری اور فردوس عاشق اعوان نے عدالت میں پیش ہو کر اپنے بیانات پر عدالت سے غیرمشروط طور پر معافی مانگ لی۔
اس موقع پر جسٹس روح الامین کا کہنا تھا کہ اللہ تعالی بھی معافی کو پسند کرتا ہے، لیکن جس شخص کی دل آزاری کی گئی ہو اس سے معافی مانگنا ضروری ہے۔ عدالت نے فواد چوہدری اور فردوس عاشق اعوان کو حکم دیا کہ آپ دونوں جسٹس وقار سیٹھ کی قبر پر جائیں اور ان سے معافی مانگ کر آئیں۔ آپ ذمہ دار لوگ ہیں، اگر آپ بھی ایسی زبان استعمال کریں گے تو عام آدمی سے کیا توقع کی جا سکتی ہے۔
عدالت نے فواد چوہدری اور فردوس عاشق اعوان کو تحریری حلف نامہ جمع کرانے کا حکم دیا اور کہا کہ آپ حلف نامہ جمع کرائیں پھر عدالت آرڈر جاری کرے گی۔
واضح رہے کہ اس توہین عدالت کیس میں سابق اٹارنی جنرل انور منصور خان، سابق مشیر احتساب شہزاد اکبر اور وفاقی وزیر قانون فروغ نسیم پہلے ہی معافی مانگ چکے ہیں۔
