آرمی چیف جنرل قمر جاوید باجوہ نے کہا ہے کہ ہم نے دہشت گردی کے خلاف جنگ میں ایک طویل سفر طے کیا ہے، ہم دہشت گردوں اور ان کے سہولت کاروں کا ہر صورت خاتمہ کریں گے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی زیر صدارت 247 ویں کور کمانڈرز کانفرنس جی ایچ کیو میں منعقد ہوئی، جس میں ملکی سیکیورٹی کی صورت حال بالخصوص بلوچستان میں حالیہ واقعات پر جامع بریفنگ دی گئی، اور شرکاء کو پاکستان کو عدم استحکام سے دوچار کرنے کی مخالفانہ کوششوں کا مقابلہ کرنے کیلئے کئے جانے والے اقدامات سے آگاہ کیا گیا۔
CCC presided by #COAS held @ GHQ. Forum was given comprehensive briefing on security situation in the country particularly recent incidents in Balochistan. The participants were apprised on the measures being undertaken to counter hostile efforts to destabilise Pakistan. (1/5) pic.twitter.com/7apPmCQ1rH
— DG ISPR (@OfficialDGISPR) February 9, 2022
آئی ایس پی آر کے مطابق شرکا نے ان شہداء کو خراج عقیدت پیش کیا جنہوں نے بلوچستان میں حالیہ دہشت گردی کے حملوں کو بہادری سے پسپا کرتے ہوئے ملک کے دفاع کیلئے لازوال قربانیاں دیں اور انہیں بھاری جانی و مالی نقصان پہنچایا۔
سربراہ پاک فوج جنرل قمر جاوید باجوہ نے دشمن قوتوں کے عزائم کو ناکام بنانے کیلئے فارمیشنز کی آپریشنل تیاریوں اور حفاظتی اقدامات پر اطمینان کا اظہار کرتے ہوئے کہا کہ ہم نے دہشت گردی کے خلاف جنگ میں ایک طویل سفر طے کیا ہے۔ مسلح افواج نے قوم کی حمایت سے ہر رنگ و نسل کے دہشت گردوں کے خلاف کامیاب آپریشن کیا ہے، امن بحالی کیلئے کی گئی کوششوں کو دشمن کے ہاتھوں سبوتاژ نہیں ہونے دیں گے، اور ہم دہشت گردوں، ان کے سہولت کاروں اور ساتھیوں کی باقیات کو ختم کر دیں گے۔
