کرناٹک ہائیکورٹ نے حجاب کیس کی سماعت میں کہا ہے کہ کیس کا فیصلہ آنے تک مسلمان طالبات اپنا مذہبی لباس یعنی حجاب نہ پہنیں۔

بھارتی میڈیا کے مطابق کرناٹک ہائیکورٹ میں تعلیمی اداروں میں حجاب پر پابندی کے خلاف درخواستوں کی سماعت چیف جسٹس کی سربراہی میں تین رکنی لارجر بینچ نے کی۔

ابتدائی دلائل کے بعد عدالت نے سماعت پیر 13 فروری تک ملتوی کر دی۔ مختصر سماعت میں عدالت کا کہنا تھا کہ جلد کرناٹک کے تعلیمی اداروں کو کھولنے کا حکم جاری کیا جائے گا، عدالت کا مزید کہنا تھا کہ کیس کا فیصلہ آنے تک طالبات مذہبی لباس پہننے پر اصرار نہ کریں۔

واضح رہے کہ بھارتی ریاست کرناٹک میں بی جے پی کی حکومت ہے، جس نے 5 فروری کو تعلیمی اداروں میں یونیفارم کی پابندی کے احکامات جاری کئے تھے۔ ان احکامات کی تعمیل میں بعض تعلیمی اداروں نے باحجاب طالبات کو داخلے سے روک دیا تھا۔ اس کے بعد مسلم کمیونٹی کی جانب سے ریاست میں مظاہرے کئے گئے اور کرناٹک ہائیکورٹ میں اس اقدام کے خلاف درخواستیں بھی دائر کی گئیں۔