افغانستان کی وزارت برائے اعلیٰ تعلیم نے ملک چھوڑ کر جانے والے یونیورسٹیز کے اساتذہ سے وطن واپس آنے کی اپیل کی ہے۔

افغان نیوز ایجنسی طلوع کے مطابق وزارت نے واپس آنے والے تمام اساتذہ کو مکمل تعاون کی یقین دہانی کرائی ہے۔

وزیر برائےاعلیٰ تعلیم بلال کریمی نے اپنے بیان میں کہا ہے کہ ملک میں سیکیورٹی کا کوئی مسئلہ نہیں ہے، حکومت  افغانستان اپنے ملک میں واپس  آنے والے ہر شخص کو خوش آمدید کہے گی، اور ان کے ساتھ تعاون کرے گی۔

میڈیا رپورٹس کے مطابق بیرون ملک مقیم افغان اساتذہ کا کہنا ہے کہ جب تک افغانستان کی جامعات میں تدریس کے عمل کا آغاز نہیں  ہو جاتا، ہم واپس نہیں آئیں گے۔ مزید کہا کہ تدریس کے عمل کا آغاز کرتے ہی حکومت کو پروفیسرز کی تنخواہیں بڑھانی ہوں گی، کیونکہ ابھی جتنی تنخواہ کا اعلان کیا گیا ہے، اس سے معمولات زندگی نہیں چلائے جا سکتے۔

یاد رہے کہ گزشتہ برس اگست میں سقوط کابل سے قبل ہی 225 سے زائد ماہر پروفیسرز ملک چھوڑ کر چلے گئے تھے۔