پاکستان مسلم لیگ ن کے صدر میاں شہباز شریف نے کہا ہے کہ برطانیہ ملکہ کے آسرے پر تو نہیں رہنا تھا، وہاں رہنے کیلئے اثاثے بھی بنانے پڑے۔

منی لانڈرنگ کیس میں مسلم لیگ ن کے رہنما شہباز شریف لاہور کی احتساب عدالت میں پیش ہوئے۔ دوران سماعت شہباز شریف کا کہنا تھا کہ 2004ء میں برطانیہ سے پاکستان آنے کی کوشش کی، تو میرے اور سلمان شہباز کے خلاف برطانیہ میں تحقیقات شروع ہو گئیں۔میں نے وہاں رہ کر اثاثے بنائےہیں، لیکن اس کا سارا ریکارڈ موجود ہے۔ میرے پاس ایک ایک دھیلے کی ٹرانزیکشن کا بھی ریکارڈ موجود ہے،  اب تو دودھ کا دودھ  اورپانی کا پانی ہوگیا ہے۔

شہبازشریف نے عدالت میں بیان دیا کہ سارے ادارے مل کرالٹے ہوگئے لیکن میرے خلاف کچھ نہیں نکلا۔ مجھے نیب کے عقوبت خانے میں رکھا گیا، پونے 2 سال  سے تحقیقات جاری ہیں۔ حکومت میرے اکاؤنٹ منجمد کرواتی رہی، میرے  اوپر گرانٹ میں کرپشن کا الزام لگایا گیا۔ انہوں نے کہا کہ کرپشن تو دور کی بات ہے میں نے غریب قوم کے ایک ہزار ارب  روپے کی بچت کی اورعوامی مفاد میں کئی پروجیکٹ کا انعقاد کیا۔صاف و شفاف بولی کروائی اور کم ترین قیمتوں  پر پروجیکٹس کے ٹینڈر دئیے۔

شہبازشریف نے کہا کہ میں خود بولی کو کم سے کم کروانے کیلئے کمپنیوں سے مشاورت کرتا تھا، اگر عوامی پیسے کا احساس نہ ہوتا تو میں یہی پروجیکٹس کروڑوں میں دے  دیتا۔ انہوں نے کہا کہ میں قبر میں بھی چلا جاؤں تو پھر بھی حقائق نہیں بدلیں گے۔