اسلام آباد ہائیکورٹ نے پاکستان تحریک انصاف کے رہنما عمر امین گنڈا پور اور خیبرپختونخوا کے صوبائی وزیر شاہ محمد کی نااہلی کو کالعدم قرار دے دیا ہے۔

آج چیف جسٹس اسلام آباد ہائیکورٹ جسٹس اطہر من اللہ کی سربراہی میں عمر امین گنڈا پور، علی امین گنڈا پور، شاہ محمداور مامون الرشید کی درخواستوں پر سماعت ہوئی۔ عدالت نے فریقین کے دلائل سننے کے بعد فیصلہ محفوظ کر لیا، جو جمعےکی نماز کے بعد سنایا گیا۔

محفوظ فیصلہ سناتے ہوئے عدالت نے ڈیرہ اسماعیل خان کی میئر شپ کے کیلئے پی ٹی آئی کے امیدوار عمر امین گنڈا پور کو الیکشن لڑنے کیلئے  اہل قرار دیا اور ان کی نااہلی کا الیکشن کمیشن کا فیصلہ کالعدم کردیا۔ اس کے ساتھ اسلام آباد ہائیکورٹ نے خیبرپختونخوا کے صوبائی وزیر شاہ محمد کی نااہلی کا فیصلہ بھی  کالعدم قرار دے دیا۔

اس کے برعکس اسلام آباد ہائیکورٹ نے بکاخیل سے پی ٹی آئی کے امیدوار مامون الرشید کی نااہلی کو برقرار رکھا جس کے بعد اب وہ تحصیل چیئرمین کا الیکشن نہیں لڑ سکیں گے۔