آرمی چیف جنرل قمر جاوید باجوہ نے آج پنجگور کا دورہ کیا جہاں انہوں نے پنجگور حملہ پسپا کرنے والے فوجی جوانوں کے ساتھ دن گزارا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف کو مقامی کمانڈر کی جانب سے سیکیورٹی صورتحال اور ابھرتے ہوئے خطرات سے نمٹنے کے میکنزم پر بھی بریفنگ دی گئی۔

آئی ایس پی آر کے مطابق آرمی چیف نے جوانوں سے خطاب میں بروقت اور موثر ردعمل کی تعریف کرتے ہوئے کہا کہ  مقامی آبادی کی سیکیورٹی اور تحفظ یقینی بنائیں گے، اور بلوچستان میں ملک دشمن عناصر کی سازشیں ناکام بنائیں گے ،جوان اپنی آپریشنل تیاریارں برقرار رکھیں۔ آرمی چیف کاکہنا تھاکہ دہشت گردوں کو کسی بھی قیمت پرحاصل کی گئی  کامیابیوں کونقصان پہنچانےکی اجازت نہیں دیں گے۔

آرمی چیف نے اس موقع پر مادروطن کا دفاع کرنے والے شہدا کو خراج تحسین کیا۔

آئی ایس پی آر کے مطابق آرمی چیف نے پنجگور کے قبائلی عمائدین سے بھی ملاقات کی اور دہشتگردی کے خلاف جنگ میں عمائدین کے کردار کو سراہا۔

یاد رہے کہ ضلع پنجگور میں فوجی جوانوں نے 2 فروری کو دہشت گردوں کا حملہ پسپا کر دیا تھا، اور بعد ازاں کلیئرنگ آپریشن کے ذریعے علاقے میں موجود دہشت گردوں کا خاتمہ کر دیا تھا۔