پاکستان پیپلز پارٹی کے شریک چیئرمین آصف علی زرداری کو خرابی صحت کے باعث ہسپتال داخل کرا دیا گیا ہے۔

پیپلزپارٹی کے شریک چیئرمین آصف علی زرداری کا  آج امیر جماعت اسلامی سراج الحق سے ٹیلیفونک رابطہ ہوا تھا، جس کے بعد دونوں رہنماؤں کی ملاقات آج رات 7 بجے جماعت اسلامی کے مرکز منصورہ لاہور میں ہونا تھی۔ لیکن اس ملاقات سے قبل آصف علی زرداری کی طبیعت اچانک خراب ہو گئی، جس کے بعد انہیں لاہور کے نجی ہسپتال میں لایا گیا، جہاں ڈاکٹروں نے ابتدائی ٹیسٹ کے بعد انہیں داخل کر لیا ہے۔

ذرائع کے مطابق  آصف علی زرداری ناسازی طبیعت کے باعث آج  سراج الحق سے ملاقات کیلئے نہیں جاسکیں گے۔ دونوں رہنماؤں کی ملاقات کا نیا شیڈول جلد جاری کیا جائے گا۔

جماعت اسلامی کے ترجمان نے بھی  ملاقات ملتوی ہونے کی تصدیق کرتے ہوئے کہا کہ ملاقات کا نیا شیڈول آئندہ چند روز میں جاری کیا جائے گا۔